قصيدة الشمعة

زجل عبدالرشيد عمهم
الشمعة


يالشمعة لحزينة لله سمعيني جاوبيني عفاك بكلام

مال دموعك حارة تجفيني زادتني عداب والام

بجوارك انتي اليوم خليني لا تحرقي فتيل لحلام

نارك هكدا ڰاديا تعمينــــــي ما مسحت ليا ظــــــلام

علاش تدوبي وتهجريني

ياك احنا خاوة ف الدوام

نواسيك يالشمعة و واسيني

مالكي تبكي ع العوام

لهيبك باهت ما يدفيني

ماسخن لي عظام

بفراقك يالشمعة تالميني

خليتي ف الڰلب تحمام

ف نهارك صايمة تعديني

صامتة على لكلام

الوقفة جامدة ماتغريني

مبرزة كيف صنام

كنتي يالشمعة تغويني

شهدة رايقة بالتمام

بين حقول الزهر تسلبيني

صايلة بنت لحكام

واليوم مكفنة ما تعنيني

تبقاي ف ضميري ركام

بشعاعك يالشمعة طربيني

يزول عني السقام

يا بنت الجباح عرفيني

يا الشمعة لحارقة ليام

تمنيت فيوم تسميني

الملوع بدموع لقلام
من بالك ما تحيديني
يابنت العز ولقوام
صبارة حزينة تبكيني
سكرانة بدون مدام
انتي غالية ف عيني
وليك الف سلام
لما تطفاي تحيريني
اعم مكاني غمام
تركبني حيرة تفنيني
نبقى ولهان مدمام
يالشمعة لبهاك ضميني
قدك مقدود روام
ضوك ف بيتي يخفيني
وف جنابي خيلات قدام
الفراش تايه يغضيني
محكوم عليه بالاعدام
وغنج طاير يعميني
حالو بعد مماتك جدام
لله يالشمعة زوريني
لازم نصيلو لرحام
مازلتي شعيلة تسعديني
فكل ضريح ليك مقام
هادا عمهم علميني
من صبرك تعزام
لاتبالي بعدى وريني
صبرك ينصل الرخام
يوم تهرب الكهرابا نلقاك مسرارة
يفرح قلبي تزيان النظرة يالصبارة
نتدكر زمان ايام كنتي بهارة
كل يوم تبكي حالي من دون حزارة
يالشمعة المولوعة بالبكى ولمرارة
تزممات عليك كتوب ومحاضر واشعارة
تصفات عشور وتحسبت موال التجارة
تكدسات سلاعي ف خناشي بجدارة
وتفرقات مجامع وتبنات اخرى بتمارة
عليك تقامت افراح لكل صبيان عدارة
وتكفنات رواح راحت لمتواها خسارة
عليك تعتقات عناقد وسالت من القطارة
يوم تنسخات عقود وتلمطات بين سطارة
فيامك تلقحات مزاهر وفاحت عطارة
ف جوامع صايلة تبكي دموعك نحارة
مازارك نحل اهلك ضنوك غدارة
كالو شيطان ركبك نارو فوارة
وانت بالصفى والوفى مافيك دصارة
الغافلين عنك نارك تولي مكارة
حرقتي هرايا و بيوت بعزم وجدارة
ف سلا الزاهية كبرو بيك الكبارة
ولتي عروس حايطين بيك لعزارة
ف صواني رقصو بيك اهل لقصارة
فمواكب تبهري وعليك انشدو الحظارة
كتباني مبهجة ولعيون ليك انظارة
مايهموك يالشمعة لندال الغافلين الحگارة
هل الجحود ناس القزة المشرارة
الجاهلين قيمتك يابنت الجود والبشارة
حسدوك ف بهاك يالباهية دوك النبارة