عروق الراس

سبحت بين مراجي

هاجت مواجي

ماگدني تخمام

ما صلحت تعواجي

كتر هراجي

ما حجبني لتام

رابت براجي

تقلصات دراجي

على ظهري ركام

لمن نحاجي

هتر عجاجي

ضاعت لعوام

مشات ياراجي

سلكت تهجاجي

ف صدري لغام

فجر مجاجي

على من نفاجي

همي جدام

هيج تهياجي

صدى جاجي

حفات لقلام

ربي الناجي

تكسر رتاجي

جمدات لعوام

هوى تاجي

نور ماجي

مشمر لكمام

خطاطر الهم

عميقة ...شهيقة

الباس لبس لباس

ماوتاه گلاس

ريقو تغياس

عليا عساس

طار النعاس

لمطوني وسواس

الفرح تساس

لي ف الراس مساس

كان حاس

فاض نقرة

فاض نحاس


بين عروقي دساس

ناس لعدم

ملوية قواس

ف فدان حروفي

وليت خماس

هزمت خوفي

لبسوني لخراس

هادا زمان الهيف

زمان تعكاس

طلقات الصيدة

صيدو لهواس

ف گلبي حصيدة

وبرومي ونكاس

گلت قصيدة

فيها مصيدة

لعروق الراس

من الشقا قرطاس

بيه زينو عناق الناس

حلسوني تحلاس

لوقت عناد

عليا داس

تهت بين شقوف الكاس

نسيت لعناية

نسيت الساس

فدواخلي كية شية

هي لي بيا

عقلي تقاس

عدابو خناس

فسوق النخاس

دللوني

مابقات عراس

ما صلحو با س

وا فهموني

همي غراس

نجاس

فيه كرهوني

شمرت على خيالي

و محيت الشوفة

من لوناس


ردمت حيالي

مشيت ديت هبالي

گالو مسالي

سگت الريح

شبرت الريح

خالط جناس

جريت لمعاني

خيط الگول

ف جنان الرصاص

راغت الكلمة

وطاحت البيضة من الطاس

عبد انت ياگلبي مقيوس

صبرك كريم وماس

من لهنا مسيوس

طرح الشمايت فلاس

عمت لفقايس

مطرت دسايس

الخير نقاس

قص بمقص لهمامي

كويني بمنجل حامي

نقس دس حلامي

بين ظلوعي

ظهر طوعي

ظهري ملاس

تشتت صوابي

بين توابي

عطيتهم جوابي

ضاع لقياس

مريت عدابي

جلجت شبابي

مضيت نابي

درت لفمي بياس

خيط رقاع لمعنى

بسلك النقاد

فرسو كلامي

وزعو معاني

هرسوه تهراس

گالو حرفك مدغدغ راشي

ساسو مافيه احساس

گلت انا مرهون لحرفي

انا حرازو وعليه عساس

لاش تغير طريقو

وتكتمو ليه لنفاس

ضللتو هدافو

شرگتو الكلمة

وحروفو من الهنا دازو

خليتوه غراب مجراب

فقد تقلازو

ﯖلت يانقاد

حروفي ولادي

بياضي و سوادي

من فينا بيهم فازو

فقدتوه المعنى

طارت منو لغازو

لاش تجرحو لكلام

وتداويوه بي حساسو

ولى حصيرة قصيرة

جرات جراحو

نفروه ناسو

شغلي صافي راقي

ميزانو مقاد

والعاشق راشق ساقي

عليا جاد

فهموني سمعوني يانقاد


عبدالرشيد عمهم