الراس المظلام2
بطلب من أستاذي ادريس أمغار مسناوي،
قمت بمراجعة هذا النص.
أتمنى أن يرقى إلى مستوى تقديركم.
لا تفيقش الضو ف الراس المظلام
يزند فيه...يغلي ...يفيض...
و يرشك ب نجومه
و تحير
لا تشعلش فيه الضو
يسيح من جميع الجهات
تحسبه ترية و هو كبالة
ف المجمر جمعت عليها الجمر
و حلفات ل الطياب
ما تسير
لا تحركش ف قلبُه الأمل
عينه غارقة ف بحر عماشها
رموشها وتاد متبتة مْراكْبه
ف مرسى يابسة ...عمر شمسه
ما تشرق عل لخير
لا تنوضش الوحش الراكد
يصوط عليك دخان الكبريت
لمْرَقًد ف دواخلُه
(م نهار تخلق الشر)
بْحال صهد الكير
الراس المظلام وخا تفرشو
ب سما(ء) مبنية ب شموس
النهار و الليل...ك يسحقها
ب مهراز عقلُه المصدي
و ك يستيها ب غربال خاطرُه المثقوب
و ك تقطر من عين لسانُه، الحَوْلَة
كحلة
قطرة...
قطرة...
قير.
شعل الضو ف الراس المظلام
و قْرَ(أ) عليه السلام
(مْساكُمْ)
فَيّقْ ذَكَاءُه الراكد سنين
خرج حْداكْتُه من الخيش
خليه يتوضى ب ضو أحلامُه
و يلبس لوان الريش
و يْسَرَّحْ جناحُه
و يطير
حل القفز اللي تسد
حتى تلف بابُه
حرك الكنار اللي سْهى
حتى نْسَى تغرادُه
ف سباتُه
هَرُّه... قَفْزُه... حَلّي فَمُّه
ب الزْوان
تسمع أنغام طايرة
تتنشوى ب أصوات
النشوة منها غايرة
وتقليدها عْسير
عْزَفْ الموسيقى ف الراس المظلام
وخلي حياتُه وَصْلات
وكلامُه نوطات:
ري.. مي... فا.. صول
مرة دييز ومرة بيمول
عَمّرْ الراس العامر
موسيقى
ما تْنقصُه ثقة
ولا ف السويقة
د الكلام الموزون
يَخْطا حْنَابْلُه
الموزون
و يبات
عل لحصير
ادخلْ ل غابة الخوف
تخطى الشوك
نَفّسْ الضيق
وَسّعْ الشوف
بدل لكحل ب لخضر
حتى تخليها حَديقة
الغزلان فيها تطوف
وترقص الصالصا
اليدين متشابكين
الرجلين متداخلين
والكسدات ملاصقة
والشوف ل الشوف
مْرافقْ
والعقل فايق ثايق
واخد القلب مْعَنْكُه
و موزّعْ الخاطر
عَلْ لْغير
فجر بركان الرقص
ف الراس المَحْني
والمْغَشّي ب تكليختُه
أكثر من كُلشي
خليه يَعَلّي
و يَعْلَا على زهرُه المْدَلي
و يراقص الزمان
بحال قوس مْعَنَّقْ كمان
طالع نازل نْحيلة
شارب من رحيق وْتَارُه
و مساوي نغمة مْعَسْلَة
تْحَلي وْذَنْ الذّوَاقْ ولسانُه
بحال شَهْدَة ،ب الحلاوة
نَحْتَتْ من شمعها
مْرَشّة
كترش...
كترش...
رش.
سرحاني 2013
الرئيسية 
