عمر الحسناوي
عدد المساهمات : 13
تاريخ التسجيل : 02/12/2013
 | | موضوع: قصيدة زجلية:حمَّام لكلام 2014-04-28, 01:31 | |
| حَمـَّام لكلام
قبل ما الشارب
يتعلَّم فيَ تحمامو
بغاني لكلام
ندخل لحمـَّامو
نغسل حروفي
بصابون لبها
ومعاني جوفي
بالضو نشلَّلْها
هزِّيت فالرُّزمة
خرقة لمجذوب
ومشطة الأزمة
وغُرَّاف بَّا عَرُّوب
ومحال غ نعوم
قلتها بلسان الشك
حيث جلد المهموم
عمرو ما يتحك
الحال خانكًـ ضبابو
وأنا نمشي ما نمشي
الحَمـَّام تَلَّفني بابو
ودَخَّلني للفرناطشي
عثرت فعواد ليَّام
ورماد قلة الشي
ودخان لحلام
عماني على كلشي
رجعت منين جيت
حطَّاب فغابة الزمان
عيا لحطب وما عيت
الوقت دار سْنان
نسيت الحَمَّام ونْسَاني
يوم نسَاني راسي
ولكلام اللي خَلاَّني
درت لو قبر فراسي
مضرَّكًـْ بهبال هبيل
ولعمر خيط من السما
بضحك من دموع تسيل
كًلت نقهر الظلمة
فوق صخرة لعكًـبَة
برك جمل الحالة
فـ الكًلب الجمر هبا
وطفات فـ العين الشعَّالة
وبعد صَرْ الجفا
والحكرة اللي تعكًر
من حر الوفا
فدفد نسر السدر
عطش الخاطر ثاني
كـِ العود الجافل
الروح شاركًة فلمعاني
وماها طالع ما نازل
قطَّرت النجوم
وسقيت ذاتي بالنظرة
رضعت لغيوم
وعمَّرت كًـُلَّة من الكًمرة
مسحت ضباب الحال
بيد الكتبة
وشعلت ثلج لقوافي
بعوافي الجذبة
هزَّتني لكلمة
باش أنا مسكون
عظامها تشهاو لما
وكتافها بغاو السخون
حَمـَّام لكلام
الداخلو موجود
كِقصر السلام
اللي خارجو مفقود
ماه ضو..وضوو ما
َينْبَتْ زهر فلكلمة
وصابـونو سرْ فْسَرْ
يرجَّع الحرف نجمة
عرِّيت روحي فيه
ووضيت حروفي بالضواو
ودوَّبت جوفي فيه
حتى لمعاني
تنقاو
وبقاو.
عمر الحسناوي .
2014
| |
|
الميلودي العياشي
عدد المساهمات : 205
تاريخ التسجيل : 02/12/2010
العمر : 72
| | موضوع: حمام لكلام 2014-05-09, 21:22 | |
|
الكريم عمر الحسناوي :
معجم لغوي غني لتطريز نص زجلي لائق . الزجلية طريفة بالتشبيه الجميل الى الحمام وما لازمه . بقليل من الإستمرار في الإشتغال والحفر نراك ساميا في سماوات الزجل . دام إصرارك . الميلودي العياشي | |
|
