قصيدة زجلية:مزنة

موضوع: قصيدة زجلية:مزنة 2014-04-10, 11:59

مَزْنــــــــَــــــة

عقـَد الكاف عل النون
وكان العرس هذ الكون
وقبل لكلام كًال القـَلـَم: كاينة
الحكمة لبست الرحمة
وكًالت للما: تمنى..
كون نعمة ..كون نقمة
تبرد وتحمى
بين لرض والسما
تعلى وتدنىَّ..وتشوف
تشوف الشوف
الجوا والجوف
المحنَة والمحنَّة
وتسمَع وتسمَّع..
الأمن والخوف رنـَّة
وكان..
كًالو:وكان؟!
كًلنا:وكان..
كان الشجر بحر
وكانت النخلة نخوة
شامة فـ ظهر امنا
وكانو الويدان شجر
والبحر صدر..
فيه الكًلب للي نبضنا
وكانت المريرات حفر
ناض..سيحتو..عثر
وطوال الليل وسيحت النظر
والقنديل كان قليل ودليل
داب ودوبنا
مور ليزار كان النهار
نور ونوَّار
ساكن فينا وفيه سكنَّا
سعد ممدود
بيض لابس الصبر
غادي كًوْد بلا حدود
صافي على مد البصر
لاهنا ولاهنا..
وكان السر..
تشرب كاس المعنى
والمعنى هنا..
والهنا كاس.. والكاس بنـَّة..
غبنا أو بنَّا.. ذقنا منَّا..
إيه شربنا..
شربنا بلا منَّة..
حيث المعنى راس المعنى
بلا كاس يطيح الراس فالطاس
والطاس محنـَة.
أنا نكًوْل وأنت تكًوْل
وكثرت لكًـوَال
بلا طبل بلا كًوَال
وكل الكًوْل تْكًـال
وثقال وما سمعنا
أنت دير وأنا ندير
هذاك جامع ولاخر دير
ذاك دربوكة وذاك بندير
وكلشي غـْــنَا.. وسالا لغــُنَا..
وكان للي كان..
ومنو كانت الكاينة
طاح العام فوق خوه
ولا كنتو ولا كنا
الدرِّي وْلـَدْ امو وبوه
وباقي جدّو يتسنى
وللي كان فـ الكًلب
شي طاح فالزَّرْب
وشي طلع للكًــُنة.
عمر الحسناوي.

موضوع: رد : الموضوع: مزنة 2014-04-11, 06:28

السي عمر المسناوي
الزجال الرفيع المستوى
تغيب حتى نفتقد شعرك البهي
ثم تأتي ببصمة وازنة

دمت للكارة رمز الأناقة والتألق

عدد المساهمات : 13 تاريخ التسجيل : 02/12/2013

أخي عبد العزيز

أشكرك جزيل الشكر

وأقول:

ياسيدي

ما أنا إلا كنقطة في نهر

يلزمني بحر من الكلام

لأصل إلى البحر..

أو ربما إلى القعر.

موضوع: رد: قصيدة زجلية:مزنة 2014-04-20, 23:27

[rtl]تايقول ستندال : الفن ابتداع أحاسيس ما سبق ليها حد . هو خلق إنساني من أجل غاية جمالية " .[/rtl]

[rtl]عمر الحسناوي هنا وف هذ العمل تايبتدع أحاسيس بشفافية رائعة لغاية جماليه خصبَه باش يقول لينا مع [/rtl]
[rtl]الشاعر الالماني جوته : احنا تانتشكلوا وتانأخذوا طراز الأشياء اللي تانحبوها.

[/rtl]
[rtl]زد يا عمر الحسناوي ف حبك للحرف وتشَكَّل قصيده
[/rtl]
[rtl]أو مزنَه واروينا.......[/rtl]

[rtl]بارك الزجل فيك[/rtl]
[rtl]إدريس أمغار مسناوي[/rtl]

[rtl] [/rtl]
[rtl] [/rtl]
[rtl] [/rtl]

عدد المساهمات : 13 تاريخ التسجيل : 02/12/2013

ياشيخي
اعذرني..
كنتي ضو مخبي
وكنت ظلمة باينة
والحرف اللي تعرف
كان ومازال حبي
لكن قلة العرف
خاينة
وليوم هانا جايك ملبـِّي
ولحلمة
اللي فقلبك وقلبي
هي اللي كاينة.
ياشيخي

أنا سعيد بيك

وبالحرف اللي لاقاني بيك.