حكم و أمثال إلهام بُصفا مغربية جديدة

.
.

واش القهوة بيضا(ء)...؟
.....
واش القهوة بيضا(ء)...! ياك كا نشربوها و نعشقوا فيها جمال اللون...؟
ياك الشعرة ماحدها كحلة نتباهاوْا بيها و غير تبياض نسدُّوا لها لَعيون...!
ياك الكَمرا من قريب كلها ظلام...! بيها نلقاوْا الطريق...و تنوّر الكون
كون ماكانش اللون الأسود...آش مزيّن الخد غير الخالة على حرف النون...؟
ياك التقوى هي اللّي تفرّق بين الناس و بلا بيها آش تكون... واش نكون...؟
ياك النهار بشمسو يغذي و يمتّع و الليل بظلامو يراري و ينعّس حتّى المجنون...؟
...
ilham boussafa
04/11/2012

موضوع: قالوا زمان و قلت اليوم 2014-01-09, 09:31

حكم و أمثال إلهام بُصفا مغربية جديدة 420510_3019899710360_158857576_n

.
.
قالوا زمان

إيلا حبوك ارتاح لا تتعب لا تشقى ولا تجيب نفقة

قلت اليوم

إيلا حبّوك ارتاح و ريّحهم...ملّي يشقاوْا حتى انت اشقى
الحب اخذ و عطاء...حك على جيبك و دخّل لالّة النّفقة
لا تورّك على القلب...تطلع ف الراس و يلوحوك للزنقة
ارجع لدارك...خلّيهم ياكلوا على قدّهم و ينساوْا اللحم بالمرقة
**
ilham boussafa
19/02/2012

.
.

قالوا لْ لَحمار...كون رجل و ما تديرش راسك ف لَحمير
قال...ما سخيتش بْ اصْريمة و الْبَردعة ليَ سلهام من لَحرير
ابْغيت نكون حمامة...خفت من جناوح لَبردعة لا يردُّوني كبير
نطلع للسما و نتعاند مع الرعد...ابْغيت نبقى فوق الأرض صغير
الكلب كلب...القرد قرد...آش خلاّها اللعبي...أنا حمار و بِخِيييير
...
ilham boussafa
27/02/2012

.

هذ الوقت...ما فيهاش عوّل على حبيبك ورّك و انعس
فيها الصح... باش تكون عزيز و ما تبقاش علْ الضّس
ما تاكلش حبيبك كلُّو...خلّيه حتى هو ياكل منّك و يلحس
إيلا جيبك خاوي اعطي من ذراعك و الله يرحم مُول النفس

موضوع: دير بْ فايس بوك و فايس أمّك 2014-01-09, 09:38

.
.
دير بْ فايس بوك و فايس أمّك
***
اشحال من فايس بلا بُوه برّا...ما لقى حيط فاش يتخبّى
انت بُوك امهلّي فيك...و الفايس برّا بوه ف الحبس يتربّى
انت على حيطك تكوبْيي كولي و هو يحلم يتهنّى من لَحدْبّا
دير بْ فايس بوك و أمّك و انشر على حيطك الصفّا و لَمحبّة

***
ilham boussafa
26/02/2012

.
.
قال شكسبير

إذا غضبت الفتاة...اتركها بمفردها و ستعود لك مشتاقة

قلت

هذ الوقت...انت و زهرك غير وجّد لعينيك مشاور و غْلاقة
لوح الجلابة... ألبس سروال طايح و ف وذنك لصّق حلاقة
إيلا كانت بنت الأصل ترجع لك و تولّي سماك عاطفة و مرزاقة
ويلا كانت طمّاعة...اصنع لفلوس و اتج ضاحكة بمقص الحلاّقة
...
ilham boussafa
05/02/2012

.

لعيالات الحادكات خرجوا يعاونوا الرجال على مولاي الزمان
ما حيلتهم لولادهم ...للكوزينة.. لخدمتم.. للحديدة و الحكّان
لمرا واخّا تكون مريضة...كلشي منها و الله يحسن لها لعوان
ماشي عيب إيلا ذاقت خبز راجلها جاي سخون من الفران
تفرح و يكبر ف عينها و يبقى قلبها ليه يعزف أحسن الألحان
الرجولة ماشي يحط ارْجل على ارْجل و يفرقع الدلاح و الرمان
الله قال...عاشروهن بالمعروف...ماشي ذوقوهم لعذاب بالألوان
...
ilham boussafa
05/02/2012

.

الكسدة غير غلاف و مع الوقت تتبدّل و العمدة ف جوفها
واش ابقات ف صباغة الكلمة واللاّ ف زريعة حروفها...؟

*****
ilham boussafa
05/02/2012

حكم و أمثال إلهام بُصفا مغربية جديدة 396432_2911080989960_1329706071_n

.

قال جورج برناردشو

هناك أناس يصنعون الأحداث
و هناك أناس يتأثرون بما يحدث
و هناك أناس لا يدرون ماذا يحدث

قلت

كلشي كا يصنع الأحداث...غير كلها و صنعتو
كلشي كا يتأثر باللي يجرى...غير كلها و دمعتو
و كلشي عارف آش واقع...غير كلها و صمت لغتُو
...
ilham boussafa
06/02/2012

.

سعدات اللي يقدر يفك اوحايل حمل الأرض من لَغدر
ويلا طاح الريال...ما نلعبوش عليه...لا نشربوا لَبحر
انعملوا للدنيا ابحال اللي انعيشوا ديما و ما ننساوش لَقبر
...
ilham boussafa
05/02/2012

.

أي حاجة إيلا تلاحت ورانا
كاترجع كنز ف بحر سمانا

تقدر تكون كلمة طاحت من الميزان
واللاّ ريحة من اروايح ذاك الزمان

اشحال من دغمةْ خبز اتخَطّيناها
و اليوم نبكيوْا طحينها و ماها

سولوا النقطة اللّي على باب النون
تحكي لكم لذة الخبز و الزيتون

سولوا الهمزة اللّي كانت فوق راس اللّيف
علاش رجعت تحت رجليه كِ اوْراق لَخريف

أيْ حاجة لَحناها و امْشينا
ترجع ذكرى غالية و حنينة

نقطة الحاجة تكبر فينا
و ترجع قيمة من ماضينا

...
ilham boussafa

03/03/2011

حكم و أمثال إلهام بُصفا مغربية جديدة 196449_1766719221631_3640894_n

.
.
قالوا زمان

إيلا فاتك الماكلة قل شبعت
ويلا فاتك الهضرة قل سمعت

قلت

نبغي نعرف... فين باتت نقطة حرف النون
اللّي قاطع لساننا بالسمن و لعسل آش يكون
و اللّي دخل لسوقنا و بدّل للسما لَغطا و اللُّون
إيلا فاتني لكلام... انسوّل ما نخلّي عقلي مرهون
ندخل ف إنّ و حتى و ما نبقاش ف دار غفلون

قلت

ماشي عيب إيلا اكليت و سوّلت و تغامزت عليَ لعيون
العيب إيلا مافهمتش و بات عقلي يغنّي لراسو الملحون
كل يوم كانتزاد...نبغي نكبر و نصغار حتى نودّع الكون
...
ilham boussafa

2010

.

كاينة لَمرا اللي على رجلها تتعدّى
و كاين الرجل... اللي بمراتو يتغدّا
العشرة حلاوة ماشي هراوة و مقدّه
لمرا من ضلع الرجل للفرح و الشدّة
هي امراتو و أختو و أم اولادو ل غدّا
...
ilham boussafa

2010

.

ما حدّك واقف...ما تْشوف غير ف السما
نهار تطيح و توقف... تتمتّع بالخضرة و الما
و تولّي رجليك علْ الأرض و تفهم الحكمة
اللّي واقف ديما... محبوس ف القنط و الظلمة
و اللّي يطيح... يتلذذ الوقوف و يشوف الرحمة
...
ilham boussafa
11/02/2012

.

اللّي صبر و فهم وسخ الناس اللّي دايْرين بيه
يغسل بوسخهم و الوسخ عمرو ما يعمي عينيه
يستافد من الوسخ و من الشواري ما يخرجوا رجليه
بيه يكبر و يعيق و يفيق باش يحاربُو و ما يقرب ليه
...
ilham boussafa
31/10/2011

.

الحيط ستره إيلا ضركْكْ
ماشي يحبسك و يضربكْ
...
ilham boussafa
06/04/2011

.

خرّج الغضبَه...قبل ما تخرج عليك
لا ترجع جذبة..و يبدا حمّو يتحيّر فيك
...
ilham 2011

.

كل واحد فينا كيف شايف سماه
شي الهم يضحكو و شي الهم ارْماه
شي يصيّد الحوت وشي الحوت اكْلاه
كاين اللي لابس... واللباس عرّاه
و كاين اللي امْعرّي و لَعْرا غطّاه
كلها و عينو الثالثة حتى يلقى مولاه
...
ilham boussafa

2011

حكم و أمثال إلهام بُصفا مغربية جديدة 199333_1760136817075_7575948_n

.

ما تكون نكتة جميلة تتعاود حتى تطلع ف الراس
ولا حكاية مخبلة و طويلة تضرب المطرقة و الفاس
كون كلمة اليوم و كلمة غدّا...يتشوقوا ليك كل الناس
كون نغمة حلوة و خفيفة تضرب المثل ماشي القرطاس

...

ilham

2012

حكم و أمثال إلهام بُصفا مغربية جديدة 1497556_10201898547379180_31755660_n

.

كاين اللّي إيلا شاف السلُّوم... يجري باش يطلع لراس الجبل
و نسى باللّي إيلا وحل...يتمنّى اللّي عتقو بيه... باش ينزل
السلُّوم ماشي غير للطلوع حتى للَهبُوط ملّي ف الفوق تحصل
...
ilham boussafa
26/12/2013

حكم و أمثال إلهام بُصفا مغربية جديدة 1535439_10201878638721476_1306866876_n

.

الشطّابة كاتبقى شطّابة... واخّا تتزوّق و تدير لَكتاف
وجهها ديما يلحس ف الزبل و ركادها حدا خنز الجفّاف
...
ilham boussafa
23/12/2013

حكم و أمثال إلهام بُصفا مغربية جديدة 1483061_10201888522528565_1772654881_n

.
.
الشطّابة شافت الجفّاف...و ابقات لالّة تتنفّخ و عليه تدفل
هو بعدا يعوموه ف جافيل...أما هي عل الريق تلحس الزبل
...
ilham boussafa
24/12/2013

حكم و أمثال إلهام بُصفا مغربية جديدة 1512402_10201898836706413_850557531_n

.
.
الشمس تبقى هي هي و حناكها ما نقسو... ما زادو
و اللّيل...واخّا القمر يشعل نورو... ما يفيق من ركادو
الرجل هو الكلمة... ما يبدّلها و عليها يبقى ف عنادُو
...
ilham boussafa
26/12/2013

حكم و أمثال إلهام بُصفا مغربية جديدة 1526122_10201863409100745_1883260928_n

.
.

كون ما كانش اللّيل...ما تبان قمره و لا نجوم
ملّي تبغي السما تعزاز...كاتتخبّى ورا لغيوم
الفرح إيلا طال يقنّط...و يكون لذيذ بعد لهموم
...
ilham boussafa
20/12/2013

حكم و أمثال إلهام بُصفا مغربية جديدة 1520714_10201878405355642_348728654_n

.
.

جمع خنزو اللّي فيه ينعل
و غطّاه بصبّاط كايشعل
...
ilham boussafa
22/12/2013

حكم و أمثال إلهام بُصفا مغربية جديدة 1526309_10201838203030609_1767642605_n

.
.
لهجة بلادي و لا لهجة البلدان
________________________
كون كُنّا نحبوا لهجتنا...كون نخرجوا منها لَعجب
أي لهجة فيها النحاس...الفضة...القصدير و الذهب
عينك الثالثة ميزانك...غربل و صفّي... عاد اشرب
لهجتا عليها حلّينا عينينا...حيد القشرة و كول اللّب
...
ilham boussafa
16/12/2013

حكم و أمثال إلهام بُصفا مغربية جديدة 524665_10201820486507707_647935827_n

.
.

كاتبقى الكذبة البيضة تكحال...تكحال حتى ما تبقاش الحقيقة تبان
ما يبقاش عندك الشك باللّي عبد الوهاب الدكالي... هو شارو خان
ههههههه
...
ilham boussafa
13/12/2013

حكم و أمثال إلهام بُصفا مغربية جديدة 1476297_10201820433946393_1009633499_n

.
.

بين لَكحل و لَبيض كذبة جديدة... تساين إينا صف تشد
واش ف صف الكذبة البيضة واللاّ الكحلة اللّي ما ليها حد...؟
...
ilham boussafa
13/12/2013

حكم و أمثال إلهام بُصفا مغربية جديدة 1461047_10201820019136023_647571016_n

.
.
كاتبقى الكذبة البيضة...تكحال...تكحال حتى ترجع حقيقة ف الراس
يتأكد و يحلف باللّي باب المنصور ف باريس و لا تور إيفيل ف مكناس
...
ilham boussafa
13/12/2013

حكم و أمثال إلهام بُصفا مغربية جديدة 1497771_10201817534313904_1558716513_n

.
.
الزمان هو هو...ما دارها لا بيدّيه و لا برجليه
غير احنا... مارضيناش بالغلط و سمّيناها فيه
نهار نعتارفوا... يفرح الزمان و تولّي راشقة ليه
...
ilham boussafa
13/12/2013

حكم و أمثال إلهام بُصفا مغربية جديدة 1477881_10201817206265703_1059860779_n

.
.

الجبل ما يرجع كُدية و الكدية عمرها ما تحلم ترجع جبل
ما تتعلّق فين تتفلّق و ما تدخّل راسك ف لَهتوف و توحل
دير اللّي يرضي الله و ضميرك و اطلب الرحمة ملّي ترحل
اللّي ابغ يضرب لك الطر و البندير زيدو التعريجة و الطبل
...
ilham boussafa

12/12/2013

حكم و أمثال إلهام بُصفا مغربية جديدة 1510489_10201814268032249_766477190_n

.
.
الشمس كاتداوي و تمرّض و الما كايعيّش و يقتل
الحرّيكة كاتشوي و تفيدك إيلا عرفتي تجنيها بلمهل
تقدر تكثّر من الحاجة المرّة و يّاك اتكثّر من لعسل
الدنيا ميزان حلاوة و مرار... ماعليك غير توزن بلَعقل
...
ilham boussafa
12/12/2013

حكم و أمثال إلهام بُصفا مغربية جديدة 1476415_10201814199950547_17498346_n

.
.

الصبّاط إيلا ماكانش قدّك...غ يولّي جارك للطبيب
و اللسان الطويل عل لَخوا...حطُّو سطل بلا تقرقيب
...
ilham boussafa

12/12/2013

حكم و أمثال إلهام بُصفا مغربية جديدة 993478_10201812099138028_180493596_n

.
.

زحام الناس...ما تخرج منُّو غير بْ لَكشيفة
و زحام واحد وحدو...يبقى ضارب فيك حسيفة
...
ilham boussafa
12/12/2013

حكم و أمثال إلهام بُصفا مغربية جديدة 1488314_10201810705823196_680297643_n

.
.
كاينة الثقة العميا...كاينة الحوْلَى و كاينة اللّي تشوف ف الظلمة
اختر للاّهم...اللّي تفيقك من الكَلبة ما التّضْمس و لا يهزّك الما(ء
...
ilham boussafa
11/12/2013

حكم و أمثال إلهام بُصفا مغربية جديدة 1486817_10201811767449736_39854921_n

.
.
زحام الناس احسن...انت تنفخ و هما ينفخوا... ما عندك ليه لاين
و لا زحام واحد بوحدو...مضيّق عليك ف التيساع و يشربك لمحاين
...
ilham boussafa
11/12/2013

حكم و أمثال إلهام بُصفا مغربية جديدة 579645_10201808191720345_1085389496_n

.
.
اللّي كاتدير فيه ثقة عميا...كايكَوْدكْ فين ابْغَ
ويلا قرّرتي تشوف...يقطع فيك النفس و ألْغَ
دير ثقة كاتشوف باش حتى حد عليك ما يطغى
...
ilham boussafa
11/12/2013

حكم و أمثال إلهام بُصفا مغربية جديدة 1465277_10201808163719645_727622521_n

.
.
دير ثقة كاتشوف حتى ف الظللام ماهي عميا واللاّ لعمى مكحلة بيه
ويلا درتي حط عينيك ف ظهرك باش حتى حد ما يقدر يركب عليه
...
ilham boussafa
11/12/2013

حكم و أمثال إلهام بُصفا مغربية جديدة 1504074_10201806360754572_131183377_n

.
.
إيلا شفتي الثقة ابدات تعمى واللاّ غير نظرها بدا يقل
دير لها نظاظر الحقيقة و كوّدْها... لا تطيح ف الدل
دير الثقة كاتشوف ماشي عميا و سوس لمرود من لكحُل
ما تطيح ف شبكة اللّي ابغ يعميك و لا يقدر فيك يتسل
...
ilham boussafa
11/12/2013

حكم و أمثال إلهام بُصفا مغربية جديدة 1483006_10201806096547967_1269939009_n

.
.
قالوا...ف النهار الأول يموت المش
قلت...ف النهار الأول يموت الحب
...
.
إيلا بدا الزواج بالخلعة...الجبهة و الضرب
ماشي غير المش يموت...يموت حتى الحب
...
ilham boussafa
28/11/2012

حكم و أمثال إلهام بُصفا مغربية جديدة 1506433_10201806030066305_2062681445_n

.
.

اللّي خاف من يدُّو تضربُو...يلاهيها بفاس واللاّ قلم
يدرّبها عل الحركة و ما تبقاش عل الخد ناعسة تحلم
....
ilham boussafa
05/12/201

حكم و أمثال إلهام بُصفا مغربية جديدة 1005039_10201805054681921_2067743097_n

.
.
خاص السنطيحة... إيلا كانت للدفاع على الكرامة و النفس
و لهلا منها... إيلا كانت غير للنطيح و لجلوس عل الضس
اشحال منهم عل الضعيف يخرجوها و عل لَقوي يقطعو الحس
...
ilham boussafa

10/12/2013

.
.
ملّي حلّينا عينِينا و احنا ها لَقلم...ها ستيلُو و ها لَمداد
كلها و لُونو...ها اللّي هاز مطرقة و ها اللّي هاز لَعواد
شي يحب يبدع و يصنع و شي مبلِي بالشيكي و لَعناد
شي متخلّق و مأدّب و شي يطعن امراتُو و يشتم الأولاد
شي يناضل و شي ف يد تسبيح و أخرى ملونة بالفساد
شي مات خلاّ باش يتّرْحم و شي ف حياتو مشى مع الواد
...
ilham boussafa

05/12/2012

حكم و أمثال إلهام بُصفا مغربية جديدة 1475998_10201804792875376_1317175901_n

.
.
الريح يقدر يقلّع شجرة من جذرها و على التراب يرميها
و ما يقدر يحل عقدة صغيرة و لا يفك و يفهم معانيها
بالهدوء العقدة تتحل و تبقى الشجرة واقفة على رجليها
و الغضب يريّب و يشتّت و عقدة بسيطة ما يقدر عليها
...
ilham boussafa
08/12/2012

حكم و أمثال إلهام بُصفا مغربية جديدة 1459968_10201802315933454_166361506_n

.
.

واش القلب...كتاب مفتوح...؟
-------------------------------

قال...الشاعر الطيب هلو
*
قلبي كتاب مفتوح ليس صعبا عليك أن تقرئيه
و إن داهمك النوم...لا تنسي أن تغلقيه
*
قلت...
*
القلب كتاب... يفتح الصفحة اللّي ابْغَ و فيها يخبّي سطور
يطوي صفحات بيارها غارقين و امواجها هايجة عل لَبحور
ما يعرفك بكان و أخواتها...و لا بحرف الجر و المجرور
...
ilham boussafa

2013

حكم و أمثال إلهام بُصفا مغربية جديدة 1460260_10201793713718404_402680173_n

.
.
النهار قال للظلام...تكعّد من بلاصتي نوض خلّيني نطلع
جاوبُو الليل...الناس كحلُوا بْلعمى و على عينيهم راني مربّع
إيلا بنتي ليهم يا النهار غَ يديرُوا عين ما شافت و قلب ما وجع
سير شطّب ضبابك و سوس اعجاجك باش ما تبقاش فيهم تخلع
و خلّيني على عينيهم ضبابة... حيت ضو الحقيقة حزن و وجع
...
ilham boussafa
09/12/2013

عدد المساهمات : 129 تاريخ التسجيل : 12/02/2013

شكرا لك أختي الفاضلة على هذه الباقة الجميلة من الأمثال والحكم .
وإنه لكنز لا يقدر بثمن غير أنه تعذر علي قراءة جميع الأمثال في نفس الوقت .
لكنني سأ تذكرها كل ما إلتحقت بالمنتدى سأزور صفحتك للإستمتاع بطراوتها وتذوق كل مثل على حدة .

أما شريط الفيديو كان مميزا جدا قد اطربتنا ليس فقط بالإستماع للأمثال، بل ذاك الصوت الطروب والذي قد أظفى لها سحر خيالي .
ليس لدي ما أقول سوى
تبارك الله عليك وربي يحفظك أيتها الزجالة الموهوبة .

تحياتي لك أختي : إلهام بصفا .
بالتوفيق في مسيرتك الإبداعية

عدد المساهمات : 560 تاريخ التسجيل : 25/07/2010

[rtl]كل هذ العمق الواهب اللذه ...
كل هذ السفر الزارع ف طريقه المتعه..
كل هذ الجمال المنبثق من الدهشه..
كل هذ الإحساس الخارج م الحكمه ..
كل هذ لكلام المنسوج بالسحر لمحلله مداد الوجدان.[/rtl]

[rtl]كل هذا وذاك ما يجوا إلا من زجاله مجذوبة كتغيب بحال فصل الربيع وترجع لينا على مدار لحلام ...[/rtl]

[rtl]هي .. هي إلهام .[/rtl]

[rtl]شحال انت كريمه يا إلهام بإبداعك الراقي وبإنسانيتك الساميه...[/rtl]

[rtl]إدريس أمغار مسناوي
[/rtl]
[rtl]تيفلت
[/rtl]

بكل صراحة أدهشني هذا الكم الهائل من الامثال والحكم أستادة إلهام واستمتعت بقراءة الكثير منها لانها بكل بساطة وازنة وتحمل صورا شتى وتعالج الواقع وقضاياه المختلفة دام لك الألق يا إلهام وشكرا لك

خديجة صادق مدافع كتب:: شكرا لك أختي الفاضلة على هذه الباقة الجميلة من الأمثال والحكم .
وإنه لكنز لا يقدر بثمن غير أنه تعذر علي قراءة جميع الأمثال في نفس الوقت .
لكنني سأ تذكرها كل ما إلتحقت بالمنتدى سأزور صفحتك للإستمتاع بطراوتها وتذوق كل مثل على حدة .

أما شريط الفيديو كان مميزا جدا قد اطربتنا ليس فقط بالإستماع للأمثال، بل ذاك الصوت الطروب والذي قد أظفى لها سحر خيالي .
ليس لدي ما أقول سوى
تبارك الله عليك وربي يحفظك أيتها الزجالة الموهوبة .

تحياتي لك أختي : إلهام بصفا .
بالتوفيق في مسيرتك الإبداعية

أختي خديجة
ــــــــــــ
ما تديريهاش مني من قلة الصواب إيلا غبرت

حيت أنا ديما غابرة ف أنا واخّا نعست واللاّ فقت

ماكانبانش ليَ ملّي نبغيني واخّا سكت واللاّ هضرت
...
.
لك منّي مائة وردة و وردة يا وردة

الله يحفظك

تحياتي لك

» أمثال وحكم
» أمثال شعبية متداولة قالو لولا يا سيادي
» هنالك حركة حداثية شعرية مغربية اتخذت اللغة الدارجة لغة تكتب فيها الشعر بكل معانيه الحداثية الشاعر السوري شاهر الخضرة