عبدالعالي الوالي
عدد المساهمات : 54
تاريخ التسجيل : 20/09/2013
العمر : 50
 | | موضوع: يا زجال 2013-10-20, 12:04 | |
| يا زجال ... شحال وشحال يا الساكن في دالحال وشحال كد الصبر يقاوم زحف المحال والطريق مقطوع لوصال تحفر بزحمة المنادب والحمل عليه ثقال الدوام يهلك وهموم كثيرة فالبال وشحال يا الخو وشل خزان تركب على الديار تخلي المراكد خالية والخواطر تحتار بين زهو ليالي وسويعات محسوبة بمرار وشحال يالخو والركب علم خيلو ومش بعيد شحال كدك تجري والوقت بالذهب مشري وحنا وقاتنا ضاعت فالتيه جينا من لهيه وهنا ما بق حد كلشي على سفينة ركب ربانها شديد ما يعرف مزاح زيد ..زيد .. والحق شديد إلى لق ماليه وحنا فيها غارقين زحمة ليام الشاركنا ما قوام تبغي لفوق لفوق وتزرع فطريقك لغام وشحال كدك يالخو وحتى لكلام دارو ليه لجام وعساس يسرق حتى الحس من غوتة الحروف الساكنة فالجوف وحروف خيرات السكات وشحال كدك يا الخو . راني عارف باللي حرفك صافي .. كافي .. والفهم فيه ماهو خافي لونتو بصباغة ليام عشق غريب هم لبيب هزاتو كلمة فوق الروس يدير الحس فين تقطع ويكطع بالمقص يد النحس اللي صابت الحال في زمان البخس عارف باللي حلمك وطن كبير دافي يحضن كل ملهوف فزمان الخوف وليعة السكات كثر بها الغاشي مكفوف عارف باللي كلامك ما ليه حد م اللي فاق ما ركد حاضي صوالحو للهم رافد ينشد.. يغرد .. عل السكات ما قد يسكت اللي فلسان الحق نبت كمامة فيها الكلام تهرس . عارفك يالخو زجال والكلمة تجري ويدان تسقي لرواح اللاصقة فخيوط لجراح تقطع عرق الخوف بمقص الحرف الماضي غادي ..غادي تروي العباد كلام يداوى هم الشوفة ولهيب الحر وقهر ..وقهر لاصق فالعباد على طول الدهر كلام يفتش بين الركام على الحي الباقي فينا يحرك العين الشاردة .. المبهورة .. فحداكة الظلم اللي نشر خيامو فوقنا فوق ظلنا فوق ديارنا فوق كلشي فينا. كلام طرزتو بلدي يوصل لكل الناس فيه نغمة الحال يمكن يحرك الحالة اللي غواها طريق المحال وركدة بل قياس فعقل الطفلة والتراس وفكار طاحت فالراس طيحة بلا نوضة مشى فيها الهواس والكرحة والتشيطين وشل حوايج كانت فالراس بخاست الطفلة .. وضاع التراس .. من بكري ركبو الهم والسفينة مشات وحنا باقيين هنا يا زجال نظم قصيدة تكون سفينة كي ديك اللي كال الرحمان تهز لخيار من القوم ويجي طوفان يدي الظلم والطغيان رحمة للعباد وترس بنا السفينة فبلاد الخير ونبنيو من جديد يا زجال... يا زجال عبدالعالي الوالي 2013 /09/27 | |
|
