إلا جاك لهبال
و غدروك لحباب
و القلب
صار جمرة كادية
صهدها زاد
طرطق الصدر
بحر لغدر
و لعقل اجفر
و الدمعة اتحجرت ف الشفر
لا تتكلم لا تهضر
اضغط عل الشوارب
من لكلام لخبيت
خليك هارب
و اللسان
واللسان كتفو بلحذر
لا تتكلم لا تهضر
لا تتكلم لا تهضر يكثر الحقد و الشر
و الهوة
و الهوة
تزيد تكبر وتكبر
لمحبة تتغسل بقطران
وتتكفن بلا كتان
تدخل بلا ميجال
اللقبر
و الحق
و الحق
يهز ارحيلو و يهجر
يصعاب
يصعاب اللي تهرس
يتجبر
اخرج منك ليك
و ادخل ليك منك
اهبش
اهبش ف الذات المغبونة المظلومة
اصبر
اصبر و زيد ف الصبر
اطرح السؤال
اخرج منك ليك
و ادخل ليك منك
و خا نفسك ليك تتنكر
لاهيها
لاهيها
و احضانك لاحضانها جر
شدها ليك
شدة مرغوبة
شوفها شوفة ملهوفة
ارمي
ارمي صنارة الزمان
ف الدواخل
ف دواخل نفس الذات
و احصي لمزمم
ف الخاطر
من افعالك
هذا غوتيه
و هذا بالباطل حقو اديتيه
هذا غالي بالرخيص بعتيه
و هذا اكوتيه و لحر ليام ارمتيه
هذا هواك واجفتيه
نوض عجاجة
باش لقلوب تتفاجا
يبان الل ف الخاطر غابر
فكر
و زيد فكر
شحال
شحال
شحال من صاحب و حبيب
لظلمك غفر
اصبر و زيد ف الصبر
داوي لجراح
و انسى اللي راح
بديك الروح الطاهرة الغابرة
ف ذاتك المنسية
اطفي جمر القلب
و برد الدم الفاير
كمد الضلوع لمكسرة ف الخاطر
و ردها قبر
و ردها قبر لهمومك الشاغلة بالك
فك لخبال
و خلي عقلك قنديل
بضو يبان الرجا
و يغيب باسك