عزيب لكلام...

عْزِيبْ لَكْلاَمْ ...

عِْزيبْ لَكْلاَمْ
حْرُوفْ ... وحْرُوفْ
حَرْفْ طَالِي كْفُوفْ المعْنَى
حَنَّة
حَرْفْ مْسَرَّجْ عَوْدُ فَالسُّرْبَة
مْحَبَّة
حَرْفْ يْگَرْشَلْ شْعِيرْ ودْرَة
هَدْرَة
وحَرْفْ يَغْزَلْ مَنْ صُوفْ لَكْلاَمْ
سَلْهَامْ ...
لْبَسْتُ فَادْخَالِي قَشَّابَة
فْلُونْ الحَرْمَلْ
والشَبَّة سْفِيفَة
عْلِيهَا نَتْبَخَّرْ فْلِيلَةْ الجَّدْبَة
نْسَاوِي المَشْيَة
فَدْخُولِي
لَعْزِيبْ لَكْلاَمْ
الحَالْ عَيْطَة
مَنْ دِيكْ الخَلْوَة
عَلْوَة ...
وسْوَاكَنْ مَرْيُوحَة
غَطَّاتْ خْيَالْ لحَرُوفْ
بَسْوَالْفْ گُمْرِيَة ...

عَدِّيتْ مَا گَلْتْ
مَنْ صُغْرِي لْكُبْر
مَنْ گَمَّاطْ سَرِّي
لَغْطَا لَقْبَرْ
مَنْ شِيبْ وَقْرِي
لَلْسَانْ إِلَى هْدَرْ
مَنْ احْلاَمْ فَجْرِي
لَشْفَارْ النْظَرْ
مَنْ عُكَّازْ صَبْرِي
للََعْظَمْ لِلِّي مَا بْغَا يَجْبَرْ
مَنْ غْبَارِي لَمْدَرِّي
لَصَّاحَبْ للِّي خَانْ
وَغْدَرْ...

أُعَدِّيتْ
مَللِّي بْدِيتْ كْلاَمِي
فَعْزِيبْ لَكْلاَمْ
نْغَرْبَلْ لحَرُوفْ
عْلَى كَتَّانَةْ گاشُوشِي
وَنَخْبَزْ دْگِيگْ المَعْنَى
قْصَايَدْ فْجُوفِي
وَفْخْزِينْ البَالْ
نْطَرَّفْ نُخَّالَةْ حْرُوفِي
لَدْوَايَرْ الزّْمَانْ ...

إِلَى فَاتْ الفُوتْ
نْسَگِّيهَا بْعَرْگِي حْلِيبْ ...
تْجَبَّرْ عْيُونْ السّْكَاتْ
حَكْمَة بْلاَ قْوَافِي ...

دَرْدَكْ يَا حَرْفِي
عُمْرَكْ طْوِيلْ
فَلْهَاتِي
جَابْدَاكْ ذَاتِي
مَنْ يُومْ تْگَطَّعْ مَصْرَانِي
مَنْ يُومْ فَدْفَدْ لْسَانِي
مَنْ يُومْ سْمَعْتْ بَوْدَانِي
حْرُوفِي دَاوْيَة ... فِيَ
عْگَرَتْ دْوَايْتِي
وَنْشَفْ مْدَادِي
وَاسِيتْ السّْطَرْ فْوْسَادِي
وَتخْمَامِي مَايْدَاوِي
مَايْشَافِي ...

اتْكَرْكَبْ گُدَّامِي
يَاخْيَالِي
وَعْگُدْ اكْتًافَكْ
بَگْيَادْ الصّْبَرْ
اسْگِي مَنْ سَاگْيَةْ
عْزِِيبْ لَكْلاَمْ
مَا ...هْبِيلْ
يْسَگَّمْ حْرُوفْ غِيوانَكْ
عَثْرَاتْ
مَا ... هْبِيلْ
يَتْيَمَّمْ مَنْ حْرُوفْ صْوَابَكْ
رَكْعَاتْ
مَا ... هْبِيلْ
يَزَمَّمْ مَنْ حْرُوفْ اقْوَالَكْ
لَوْيَاتْ
مَا ... هْبِيلْ
يَتْعَلَّمْ مَنْ حْرُوفْ كْلاَمَكْ
فَتْيَاتْ
وطِيحْ فِينْ رَاكْ بَارَكْ
وَاتْوَضَّ مَنْ مَاكْ لَهْبِيلْ
لَصْلاَتْكْ
رَاهْ الوَافِي مَا يْحَافِي
لاَ تْسَبَّبْ حْرُوفَكْ قْوَافِي
لاَ تْعَدَّبْ ظْنُونَكْ عْوَافِي
ولاَ تْعَجَّبْ فَزْمَانَكْ الطَافِي
لَشْمُوعْ النِّيَّة
فْرْحِيلُ
مْعَانِي مْسَلْمَة
وفْتِيلْ مَحْرُوگْ
بَكْيَةْ السْلاَمْ
عْلَى نَارْ شَاعْلَة
بَرْمُوشْ الشُّوفَة
الزَّاهْدَة
فْغَارْ مَظْلاَمْ ...
بَعْوَافِيهْ طَافِي ...
لاَ تْهَزْ رْحِيلَكْ فْليَالِيهْ
سَمّْ الرِّيحْ گَادِي
والرِّيحْ فَسَمّْهَا ... نْكَادِي
وبِينْ الرِّيحْ واللِّيلْ
رْحِيلْ
جْوَادِي
حَطَّاتْ مَنْ لَقْوَالْ
سَالَبْهَا غْرِيبْ
فْدِيكْ الغُرْبَة جَوَّالْ
رْكَاكَزُ مَهْدُومَة
مَرْدُومَة
بَهْمُومْ
ثْقُلْهَا عْلَى كِْتَافِي ...

إِلَى هَزَّكْ ضِيمْ
لحَرُوفْ
غْزَلْ مَنْ لَگْصَبْ ... شَاشِية
ضَرَّگْ الخَطْوَة
مَنْ صَهْدْ لَعْيُونْ
وگَلَّبْ شْعَابْ الْگَلْبْ
بَضْفَارْكْ المنْسِيَّة
وَشَطَّبْ گْفَاكْ
مَنْ عَارْ البَكْيَة
دْمُوعْ وَاگْفَة
عْلَى بَابْ التَّنْهِيدَة
وتَبْرَاحْ الخَلْوَة
مَاهُو كَافِي ...

خَلِّيكْ حْنِينْ
بَتْرَابْ لغْزِيبْ
خَطْوَاتْ
عْلِيهَا حْرُوفَكْ
وَحْرُوفِي مْشَاتْ وَجَاتْ
فِيكْ دَمِّي كَتْبَة
وَدَمَّكْ مَنْ دَمِّي جَدْبَة
رَاهْ الخَاوَة حَدّْهَا الدَّنْيَا
ولحَرُوفْ عَنْدْ الحَزَّة
مْعَانِي .... لِيكْ وْلِيَّ
قْوَافِي...