مَرْياحْ ميمون الغازي

مَرْياحْ*

ضْرَبْني الضّو
زْواني
بْ خَطفة
ب ْلَهفة
الدّاني بْعيـــــد
ور ماني. .

لْقيتْ الرّاحة
جنّةْ الاحْلام فيّا
وانا نقلّب عليّا
هذه ازْمانْ ساكْنني
تالْفة فيّا
جاتْ هيّ
بْ شوفَة
ب ْلَقفة
لْقاتْها فيّا

مْقطّرة هذه جنيّة
كي نْدير نْقاوم
كي نْدير
بْسبْع رْيوسْ
والثامن حيّة
زينْ هذا الكابوسْ
زينْ
طالَعْ ناكُل الكَرموسْ
هابَط
شكْونْ ڭالها ليّ
مَدڭوڭْ بشكْوكْ
الهَنديّة
كورة بين رجْليها
خاتم ف صْبعْ الوسْط
ضْبعْ
واكلْ فْقيهْ بَ كتوبو
شارَبْ سوسي ب عْشوبو
آش الدّاكم فيّا

تكْويني بْنارْها
تشْويني
تقْليني
ف ريقْها تسْلقني
تْرَيّشْني ما نربَح
ڭولو الشّح
ربْحو انتوما
اودِيرو مْزِيّة

بَسْمة
نَغْمة
رُبوعْ كلْمة
والو.. .
نْهيجْ بْحر
نولّي نْسَر
عَوْدْ مَجنونْ
نَصْهل
نرْكل
نَتمرّغ ف لوْحل
مَرْياحْ أنا
لا ساروتْ
لا بْصَل
لا زَعْتر
لا قْفل
ما نْفيق غيرْ إلى.. حَضْرتْ هيّ


*= مصروع épileptique