خريطة الزجل لمدينة تيفلت

موضوع: خريطة الزجل لمدينة تيفلت 2011-03-20, 08:39

المحتفى به من خلال رحلتنا الى مدينة تيفلت الزجال المبدع :

" احمد بنزها "

وجه من الوجوه الزجلية لمدينة تيفلت تثبت

طريقها نحو معانقة ضوء القصيدة

نختار من بين قصائده :

صــورة ف بـيــــر

حبّي لك بير غارق

تبان لي ف ماه صورة مقلوبة

النهار يرجع لي ليل

والليل يرجع نهار

و ب قوة التفكار

الأفكار ولاّت معطوبة

***

البير سرطني

ف قاعُه سكـّنـْنـّي

والقاع مراية فيها صورة

والصورة .. صورتي أنا

ب دم جراحي مرسومة

***

أنا صورة ...

والصورة ماشي هيكل

ولا عظام محسوبة

الصورة .. قلب وعقل

ب الوفا والحب راها موشومة

Admin عدد المساهمات : 62 تاريخ التسجيل : 08/04/2010

المحتفى بهم من خلال رحلتنا الى مدينة تيفلت المبدعين :

" مصطفى برواني "

" محمد امولود "

Admin عدد المساهمات : 298 تاريخ التسجيل : 08/04/2010

رائد من رواد الكلمة ، زهرة من بين ازهار مدينة تيفلت اينع شعاعها في سماء القصيدة

زجالنا المبدع الاستاذ

" الميلودي العياشي "

فلنحتفي به عبر رحلة منتدى الزجل الى مدينة تيفلت

ندرج من احدى قصائده

أنا عُنْوانِي

زمّمْني سْميّة
بْلا عُنْوانْ
عْطيني رقم دارْ
ما هيَ
ليَّ دارْ
خلّيني عفاكْ
ساكنْ فْ الورقة
ما قدّيت نخرج للظْلامْ
مدادْ زْرق او كْحلْ
أوحتّى بْلا لوانْ
بْحالْ ...بْحالْ
يْكفيني غْمام السُّؤالْ
يلسعني نخصة
تحت ضْلوعي
بيني وبين قلبي محْبوسة
تكمّدْها تنهيدة شاعْلة
بحرف محْنّة
مْعَنْية
بْصبرْجْبالْ
حْكيمة
صامدة لمْواج الطّوفانْ
ولْتراب رْياحْ جايْحة
يطفي نور عْيونْ فايقة
حاضية طُرقانْ
لا تلغيني
أنا كاين...كاين
ف غيابك أنا حاضر
فْ حضوري انت غايبْ...
غايب علْ الدوامْ
اعْطيتك راسِي
تْعجّبْ فيه
اطْلق فيه طوالْ احْلامك
تبقى فيه اعْمى
تعارك ظلامك
تلقاني ديما هارب
من حسابك
علامة "قف" قدامك

تحياتي للجميع

.

Admin عدد المساهمات : 62 تاريخ التسجيل : 08/04/2010

رائد من رواد الكلمة ، زهرة من بين ازهار مدينة تيفلت اينع شعاعها في سماء القصيدة

زجالنا المبدع الاستاذ

" ادريس الزاوي "

فلنحتفي به عبر رحلة منتدى الزجل الى مدينة تيفلت

ندرج من بين قصائده :

ريــــــــــــــح الريــــــــــــح

يا خيل الريح الزغنانة
فين يهرب حصاد الشيح
إيلا بانت الشمس عريانة؟
يا لسان لوقات الزربانة
أش يقول زراع الريح:
إيلا كانت لخواطر زعفانة؟

تخـــــرشيــــــــش
الــتشيــــــش عرام
تحت اقدام
التيــــه ترتليـــــه
تحشريج أرواح
تشحط فيها الريح
تنخسيس أوراق
من شجرة الحياة تطيح
ورقة ف الخز، ورقة ف الغيس
ورقة ف مهب الريح
و الريح
ألف ريح و ريح

رياح هي غبارية
شابكة بغبوغة و اعجاج
شبشابة
ف خيوط السدا سرابه
تحتحت الغله
تكرط الصابة
رياح وشادة التسريح
بلا شرع بلا لجام
لكلام عليها حرام
و حنا حنا
خديم و خدام
مكردفين و عاطيين السلام
لولد العم
المعمية ليه سام
صمصم يشرب المح
يطلق السم
وديما ديما
فينا بايته حابة
يا ما يا بابا

قطيع يرعى لخليع
بالخوف مقطوعة فيه
العاطي ظهرو
البردعة تواتيه
الكاري حنكو
بالوسطاني سوك ليه
تفرفير الوقت و تسرسير الريح
رياح هي ، رعوانية
ترون الدم ، تخلوض لمجاج
الغالبة غلابة
تراري لخواطر ب دابا دابا
خنق ضو ليام
ترقد الحال ف نعاس دوام
تخلي الراس
مع روحو ف خصام
هاوتسي
نعم سي
نعم
نعم
طحين الما و تغربيل الريح
تنقاز ، تقلاز و تسرتيح
حفرة ، قهرة ، مزيرية
يا حريق الرملة
يا بروديت لجبال
يا حدود لبراري
رياح هي
تمشط شعاك المغبونة بمداري
تسوق الأدمي بالشطابة
شطابة
تقطر دم
اسمع بالاك الدم
ف انياب وحش الغابة
و ديما
ديما
فينا بايته حابا يما يا بابا
***************

رياح هي زهوانية
تقلب الغوته شطيح
بين صبحية و عشوية
تروح عروسة الشتا بالهراج
ما تحلب ما تمخض سحابه
تهجل عرايس لحلام
تشطح لفقايس بلا حزام
تبوحيط الفرح
وزغاريد الكدابة
إيـــوا
خرجوا
خرجوا يالعجابة
شدوا الهيت
يبان الحال ف الجدابة
و خليوها تصيح مع الريح
بالروح بالدم
ومن تحتها الدم يغدر الدم
الدم يبيع الدم
النم يصرط و يضرب الطم
كعب غزال
وغريبة قلابه
الدرباز خباز
اللواز نقاز
الحراز طناز
العباز هباز
ولدك يا أم العز
جلبوا له ف قماطو
أشتا تا تا
ياوليدات الكراسة
تجري و تطيح يا امك
يا باك داه الريح
ف طرقان قايمة بالتعواج
مفطومين بالرهبة
الترابي بالقلبة
لقراية بالزربة
ألف با
هوبا هوبا
الشكارة عدابة
دردم، دردم
تم / اللي طاح يبقى تم
/ تم حتى يتم
الفاس يحفر ، البالا تردم
عاد عادا
بارود السكبي يا خيل الريح
رياح هي
رعوانية
مسرجة الربــــــــله
معنية بالترباج
ديخية ف القضية
طاج على طاج
القردة لعابة ف المحرك
و حنا حنا ريوس المحنة
نقولوا
هــــــا
إصابة
دابا تجي دابا
ألو ألو
تكلم بلا ما تخمم
الضر هم / الضريبة تشهم
التقرقيبة قرقابة
واياك أوا تفهم
أيه أيه البقرة حلابة
الضرب من سعد المنيابة
و ديما ديما
فينا بايته حابا
يا ما يا بابا

********
ضو الراس المطفي
لبياض جلالة على عينيه
الجوع الحرفي
مضيغ الهضرة يكفيه
لعقل ايلا عمى
الريح لى جا يديه
ويسيح مع الريح
يعمر الدعلة بالتلغاج
يمضي لسانو لشدان القشابة
هاك أوا الفوضى رواج
عند حساب الكسابة
شد ف الريح يا محتاج
قمقم
و ضرب الطم
حقك جمرة هبهابة
يا مزاوك ف غمام
الراس مظارق ف
برودة ف عظام
مشحاط ف ظهرك قطابة
صرط النكبة
باخبار البغلة
اللي ولدت كلبة
هبـــــــــــــــها بــــــــــــــــــــة

أجي ياوا نحكي لك
ضربة على ضربة
بايته حابا
في و فيك و فيها و فيه
غلطة على غلطة
نكــــــــــــابة
وحده مني
وحده منك
وحده منها
وحده منو
كلشي ديالنا و حنا مواليه
زعيل
زديح
و رديح
ركيل
نبيح
ونطيح
الهراج
المراج
غربتنا غريبة
غرابه
الرجلة معدوده للهرابة
تزغزين الريح و مخيض لمواج
دنيتنا قايمة بالهراج
مطفوجة مفتونه
مسدوده هذا الغابة
ومالها ساروت يا علي بابا
وديما ديما فينا بايته حابا
ياما يا با با

زائر

شموخ الابداع أثار احترام الحروف وتقديرها

دوما لك نكهة التفرد

كن بخير

» قصيدة بعنوان رياح الذات
» تيفلت ... بنايات على نسق زجلي...المدينة و الاعلام
» المهرجان الثاني لمدينة أزمور
» الملتقى الشعري لمدينة مريرت
» تنظيم الملتقى الشعري الثالث لمدينة مريرت