خرجات فيك : إهداء إلى الثورة التونسية

خرجات فيك

يلا حضرات الحضرة يا حروفي
والساكن فيها ما سخى بالمسكون
جدبي يا لالة
جات عليك الجدبة
واللي يكون يكـون
جدبي وڭـــولي
تونس الخضرة
ربي يرعــاهــا
والبوعزيزي بـذرة
والشعـب رواهــــا
حتى ولات شجـرة
وشكون فينا ينساها
***
جدبي ونادي
يا بوطيارة فالسما
طـالبة ضيــف الله
ما صابت عش الرحمة
غير فـيك يا أرض بيــت الله
طيــروهــا طيـرة
حباب البوعزيزي
وتبعوها بالتكواع
نيكولا ساركوزي
ڭــاليـهــــا دوزي
وعطيني بالتساع
عين الخوة بصيرة
والــيــد قصــيــرة
واللي ما خاف من الشوهة
خاف يا لالة مــن الصداع
***
جدبي يا حروفي وڭولي
خرجــات فيك
يا وكال الراس
وناعس عل البطانة
كون ساق ليك
سرب حمامنا لخبار
يوصي عليك
مكة المكرمة
ويڭولها ردي بالك
من هاد الخوار
***
خرجات فيك
يا عرة الناس
يا خاوي لخزانة
كون ساق ليك
جبل عرفة لخبار
يوصي عليك
المدينة المنورة
ويڭولها ردي بالك
من هاد المخار
***
خرجات فيك
يا قليل الفهم
واش عندك ما تفهم
وخى تڭول هادي والتوبة
وتحب روس توانسة دار بدار
اللي دار الذنب
لازم يستاهل العقوبة
ما عليها غبار
***
ونتوما يا دوك نتوما
يــا شــر الحواشـي
نحلف ما نحنت
عمر كلامكم ما يحلى شي
تونس راه صحات وجنات
وما دارت ليكم فاش تباتوا
وإمارات الصحوة عليها
واللي عندو فيكم شي غارة
يبزڭ هنا ويحسن فيها
بتسنط لعظامو
ويتسنى العدالة
واللي فرط يكرط
ما فيها مقالة

شكرا أبي العزيز على كلماتك
التي تزرع الأمل في نفوس الزجالين الشباب
لمواصلة السير في طريق القصيدة الزجلية
ودمت لنا شيخا في زاوية الزجل
التي تعج بمريدين من هنا وهناك.
والله يطول لينا في عمرك وينفعنا بركتك

شكرا لك أستاذي العزيز والله يشهد أن كلماتك دائما تبعث في نفسي أمل العيش في عش القصيدة الزجلية التي نسعد بأهلها ونقادها والمهتمين بها فطوبى لنا بك زجالا وناقدا فتح الله بصيرته لخدمة الزجل وأهله ورحم الله من قال سيد القوم خادمهم