سهرة مع الليل

البارح انا والليل سهرنا
كان مزاجو رايق
ونا قلبي كان ضايق
طفا الضو
وشعل شمعة
تبسم وقال
هادي على حسابي
الليل حكيم
حس بللي فقلبي الضيم
قال النكتة
باش نفتحلو بابي
ملي طال صبرو
سولني على النهار
اش دار معايا
ڭلت ليه خلي البير و غطاه
ما تزيد فشقايا
ما تسولني على الدار
ما تسولني على ضنايا
ماتعفس على الجرح
ياك ما باغي بكايا
ڭالي حاشا
تورني انت فنهار و خروبو
علاش انا معاديه ما نشوفو
هو بيض زاهي بشمسو
انا كحل و الڭمرة تكفيني
خلينا ياصاح من صداعو
عارفو ظالم
والناس فيه جاعو
عارفو قاسي ما يحن
ما يستاهل حديثنا عليه
ڭالها و تبسم
قاطعتو بلسان ثقيل
ما خليتو يخمم
غنيلي يا ليل
ياليل غني
وبصوت حزين
غنى الليل
وصاح
ياغربتي
ياشجرة مقطوعتْ الجدور
فروعك جافه ما فيها ثمر
ياحْسرْتي
على ارض راوْية كلاها البور
وحْلاوة اللمه وطعمها المر
رقصات الشمعة عالموال
ودمعي تحجر فجفوني
وعلى خدي ما سال
وصاح الليل
ياغربتي
ياشجرة مقطوعتْ الجدور
فروعك جافه ما فيها ثمر
ياحْسرْتي
على ارض راوْية كلاها البور
وحْلاوة اللمه وطعمها المر
دموعي نزلت شلال
غَسْلَتْ وجهي
حتى ملامحو تصفات
ومن كثرت الجدبه
الشمعه طفات
وبان خيط من النور
عرفتو صباح
ملي خفث صوت الليل
وودعني وراح

ميمون الغازي
10/11/2010