من حب غرام صبابة عشق وطاني...جيت وهاني نهديكم وردة من ورود روضة وجداني...نهديكم انشودة مباركة مسعودة...معدودة ب اهات القلب المعذب...انشودة تحكي زماني والهم لي تلاني وخلاني كفيف وظلمة فعياني... نسقسي ع الضو وفين الضو...نهمس نتلمس... فين الضو لي بنيت عليه سؤالي
حشاكم وشرف الله قدركم...انا الوطني.. كنت نصهل ب العلالي رافع علام وطاني وحد السيف يفرق الصفوف كابح جماح سرحاني...لحين غزاني ظلام... وبشريط من لياف الجريد ضمد عياني وفزنازن المرصد...عفوا المركد النتن رماني...مجرور وبقذفة صفيحة ع الديبور نزفو حناك المكعد بالدم القاني...وداك الاحمرار تشهيتو... جاني كيف ضو نار اجمر وجداني...غمست فيه القلم واكتبت اشعاري الناطقة ب انشاد سراح الضو وضو السراح والتسليم لروح الضو مولات سبع رواح... ... ...
صاح وغوت ظلام الضمادة بصياح...مثل النباح...يفزع مسامعي ودمع عياني...وضيم صبابة عشق رؤية سما وطاني موحشاني...والمغرور يجور ب السوط...والجسد المشحوط ينزف المعاني...وانا رافع النيف المنكاد بكبرياء نفتخر...صابر كلي امل يزدهر وطاني ويعود يبهر... ...نصقل حد باس الباتر نبتر ايادي الشر... ...حيث الوطني لما يبدع يخلع و لما يحاور يقنع ولما يزبد ويرعد القلم عليه يترفع
هكذا صار...ومن النبيقة ارسمت تحليقة فخيالي...درت دورة مبشورة فوق ربوع وطاني...بانو لي الاولاد فغمرة نشوة عربدة الامجاد... وحلم خيال الوطني يدرك المعاني...يعلم لي صار ويصير و ساري.
واااهيا ناري ميمتي حنا... ...واااهيا ناري كيتي انا... الاولاد خياتي خاوة المحنا...راضعين بزولة الخيانة...كالو الراس وركدو ع البطانة...تواطئوا مع القواد لي كان جلاد يسلخنا ب العكاد والكعاد ع القرعة...كان يتلذذ ب النحيب والنديب والتعذيب ب الما والضس ف الزنزانة... ...واااهيا ميمتي يا حنا حتى اشعارنا كتبناها بخرانا فغياب الكبص والمداد... ... ...واش موش حشومة نبيعو الفكر بسومة مذمومة...يلا كانت الذمم تشرات والاصوات ف السوق نفدات وعليها النفاد...الوطني اصنع من الجهد دواية ومن المجهود مداد والقلم جهاد والف فكر يتذكر و نعاودوه ب العناية والنخوة للاحفاد ومشات حجايتي مع الواد الواد