قصيدة مشتركة بعنوان الحرف التالف من توقيع السعدية الفاتحي ام زين وعبد الفتاح بوهو

قصيدة بعنوان الحرف التالف وهي من توقيع السعدية الفاتحي ام زين وعبد الفتاح بوهو

الحرف التالف

مللي خفت نتلف
ركبت الحرف عل الحرف
وشديت اطريق لكلام

مللي عرقي اذبل وجف
سلمت واحييت العرف
زربانة اتبعتو بالخف اميمتي حنيت لمجمع لرحام

اعليا وقفات مربوعة القد
باكلام امزجل اخصايلو ما ليها حد اعسل وبه جادت نحلة اعلى شهد
يا هذاك انا ليك كلي كون مني وليا هانا امعاك
الناس تتهاددى السلام وانا واياك اعلى هاذ الورقة نتهاداوا اكلام
العين بالجلالة اتغاشات واتلف لي لحساب والعد
فشلوا الركابي واتقاضى الجهد
ف احلاوة اكلامها طوبة ذابت ذوبة ما ليها حد
مدي يديك هزيني وف هاد لحلاوة غطسيني
ف امداد الدواية غرقيني
حتى انذوب ف ابحر الحرف انا واياك كل عام

حرف امعانق حرف
خايف اعليه لا يتلف
بمرود الزجل امكحلين عين الجوف
واعلى هودج لكتابة اتهزنا لحروف
اتروحنا لساحة الزجالة بازغريد واصلاة متبوعة باسلام

انبشت ف اتراب من السقوة انشف
وارويتو بميهة الحرف
اطلع شمعة افتيلتها تكدي دمعة
انكول نجمة ف السما ضوها نورني وبانت ليه صورتي ف الظلام

املكني   املكتو
خباني تحتو
انذوق لمحبة الوافية اتفيض اعلى طول الدوام

كوني ادواية امدادها ادوا لدايا
باقلم انزمم حتى تطلع ارواية
منقوشة باحروف اتعيد ما شافت عينينا ف لمنام

حرفي امتول منو درت افتايل
حرفي امتول وبه زرت اقبايل
وبغزل الصابون افركتو برشام

انت عكازي وانا لمعمي بحب الكلمة
انت اكمرتي لمضوية هاد الغمة
خللي اكتافي اترمى اعلى اكتافك
خللي اصباع يدينا تتشابك
ونمشيوا مشية راشقة خطوة واثقة اتشق اطريقها وسط التلفة والزحام

ازحام الى خفنا نتجلاوا فيه
اعلى شجرة لكتابة نرسمو حرف وعندو نتلاقاوا
لمخاوية اتخاوينا
لمتاوية اتاوينا
حطي راسك اعلى راسي وخلليهم يتحاكوا حتى تطلع وثرة عازفة زينة لنغام

اسكني اسكنتو
روحي طالعة ف ساحتو
اتقلب اعلى مرسال الحرف العوام
يجيني ف لفجر
يغيب ويحضر
القى فيا راحتو
كل مرة يلقي بصنارتو
من لمواج يلقفني
يلقاني تايهة ويطعمني
يكسيني وما يكول اعييت وصدري يزينو بتازرزيرت اتشكلات اخلالة بعد ما كانت خام

يا اسيادي
اشكون انا وللا هو البادي
انا زجالة وهو زجال
اكلامنا بين لقوافي رحال
انقطفوا من احروف الحال ووجهنا مكشوف ما امغطي بالثام

حرفي   معدن نقرة وانا معدن انحاس
انا كسدة وهو بين اكتافي راس
روحو ذابت ف روحي
باكلام يصور اجروحي
نفسي يا نفسي
نبشي وهبشي وبسرك بوحي
اعل الضو هبشي
جبدي حرف ما شي حنش
يتسقى ويترش
حرفنا نتشاركوه ملحة واطعام

ادي كلمة وجيب كلمة
خود احريف يا ليف امسيف
ابغى خوه اللي ف راس لقصيدة امولف
يرد التحية باسلام

يا حا واش من حا
امحيح وهاز لعلام وامرشح
انا وسط دواحة
ركزوني وللا نهبش عل الجرح اللي اقدام

ولفا لفا ولفة
دايرة تلفة لزجال
ابقى رحال
بين اسطور عوال
اعلى اللي يبري جرحو المعدام

فتحيني ودخلي فيا
قربيني وكوني ليا
فحصيني وعرفي دايا
اقراني سين بين لحروف
نقراك فا ما تعرف خوف
يا ك احنا اقصيدة امشكلة من احروف
احروف ما تشبه احروف
والى اتاوينا تطلع ف جريدة تجربة اعليا واعليك اجديدة
اقصيدة مزطومة بميم مرة شاد فيه ليف ومرة لام
هذاك حلمنا اللي شفنا ف لمنام اتحقق   يا للا خير واسلام

   السعدية الفاتحي ام زين
و
عبد الفتاح بوهو

» قصيدة بعنوان يا جلادي
» قصيدة :ريح مخالف قصيدة اعتراف بالجميل
» قصيدة زجلية بعنوان ضيف الليل
» قصيدة زجلية بعنوان : رمضان
» قصيدة بعنوان رياح الذات