من صاب ترجع ايام الخير
ايام العز والتيسير
***
الارض مكسية بالخضر من بهاها
والجبال عالية الثلج غطاها
***
الواد ماه الصافي يزغرد
والطيور فوق الشجر تغرد
***
الفلاح فرحان بعصابتو يشالي
يزرع الفول و يسقي الدوالي
***
مراتو الطيب وتجيب ليه
البطبوط بالسمن و العسل ترويه
***
ولادو وراء البهايم يضلو سارحين
ف لعشية يروحو الخيمة فرحنين
***
لعزارا تجمعو ف الدوار
دارو قصارة بالطارة و الوطار
***
بداو بالحصبة و خربوشة و شي عيطات
و سلاوها ب قولو العام زين البنات
***
العام الزين بانت حروف
الخير مدفق ف كل مكان تشوف
***
جا الصيف والفلاحا تضامنو
على الحصاد والدراس تعاونو
***
جمعو الصبا و خرجو العشور
و تصدقو على ليتيم و على كل مقهور
***
الجامع صبغوه بالزرابي فرشوه
و الفقيه كساوه بالمسك ريحوه
***
ف الموسم تجمعت القبايل
على السراتة و ركوب الخيل
***
العلفة مصافة تجري كود
و العلام واقف فوق العود
***
الباردية فيه يتفرجو
غير هو يجلس ابطلقة وحدة يخرجو
***
الزغاريد من كل جيه تسمع
النساء و الاطفال التجمعو
***
ف الخزانة حطو الرجال الصينية
باللوز و الكركاع و كل فاكية
***
لمقدم بالنشاط حرق العصابة
و سلت البلغة و لاح الجلابة
***
كيدور بين الميادي يفرق فالكيسان
هادي هي عادته عرفناها من زمان
***
ايام الخير من الزينها ايام
بيها نختم كلامي والسلام .
بقلم: حسن العبدي تميم