قصيدة نعْـــمة لكلام مــــــــــــــــــن ديوان دْسارة الندى بقلم محمد لشياخ

نعْـــمة لكلام


ورَّق زين لكلام فْ قلبي
ورْقة..............ورْقه
نزْلت عليه امْطار الرَّحمه
قطره..............قطره
حَبْلت لغْصان ........بْتفاح الشهْوة

خْداتُه الرِّيح فْ سلَّه
تْبيعُه فْ سوق لقبيله
خرجُــه لُــُه العزْبات
كـْلاو كلامي

تْشقَّق الزِّين فْ حْنَاكهم ورْده
نْبت النَّعمان خلخال فْ السيقان
تْمدَّد الليل كْحُل
ما تفْسخ ارباطُه عْيون الحاسدين

صبْحت ريحة لَقبيله
مَسْك
هبَّت قبْليه
سَحْرت لبنات
بَدْلت قـْـوامهم......عُود خيزوران
خَرْجُـه لـَّحْصيده الرَّجاله
لـْقاو الورد واقف
وقْفة نْبَاله
صاد الشَّرگِي بْ صَدرُه المشْقوق
صاد اللفْحه على بيوت لَقبيله

كْلامي تْحَارزْ معْجونه
بالعَشْق الواجَع فْ القلوب المجْنونه

قْرَنفل مخْنوقه ريحُه
فْ تَكميسة لمـِّيمه
تْعلقها فْ ليلة لعْقيقه
على صْدر البنت العتوقه

كْلامي تَسْبيبة قـْبول
كْتبها الليل على لوح العنبر
مْحاها الضُّو فْ البحيره

زين لكْلام عْريس مَطلوب الليله
يْزور الزهره المحْيوزه عْلى طرْف اللسان

يْحركها بْ الهوى
حتى تشرب عروقـْها الناشفه
مَن لَغرام رشْفه
تْخلي ريحْها
يْلقَّح قلوبْنا
تْخلي حْروفها
تْنوَّر شوفنا

لكْلام الزِّين مَثقالُه نعْمه
والنعْمه محْسوده