[color=red]
حروف الزين
هامت بي حروف الزين
في سروج ليل
سباتني بشوفة حنينة
رموش
حروف زينها من القمرة
مصرفة على لوجه بسمة
من نور لهلال واخذا مسحة
تخلي لخاطر فروجي
بهوا نغمه
يراقص ضو ميموني
يدندن بلا هواه
زرعني غرسة بلعمان
نكون ليك زهره في جنان
ترسمني غيمه في سما لحلم
نظلك برموشي
من شمس النهار
زرعني نسمه صيف
على وراق الدالية
تسكر لقلب لولهان
نكون ليك كل ليلة
وتيره لغيوان
ديرني ...ديرني
جوهرة في تخمامك
من ضوها نشعل في دواخلك
لمحنة لمڭدية بنار لشواق
ولا حبيتي
سقيني كل مرة
كمشة سبوله تامره
على خد ربيع
بغرامك حيرانه
نبري على برية وجوا لحيا
نسكت بيهم هذ لخاطر
ديرني مخدة لسرار
نقطف كمشه لعيا من كتافك
خيطني شيكي على شنايف لحرف
نزين شون لسرار
همس وحثيت مغزل
ولا حطني مسك في جوى لقلب
كل ما كبرت
نعانق زهوانية ليالك
والا
كان الهوى بحالي
بقلبك طوفان
شلال من لقلب هابط
خليني سياج الشوك على رسامك
نسبع بسبع ليالي
كل ما سافر ظلك
في بهى القلب
ولا زرعني على لخد
غيمة نهار وليل
نكون ريشة
نحني كفوف يامك
بلون الشمس
ولا كان لهوى بقلبك منور
شعلني منو
ضو في دواخلك
ولا كان لغرام بقلبك فتان
زرعني فيه عيون شهرزاد
نحكي ليك
حكاية حروف الزين
تغفى على كف لمحنة
تراود ثوب الليل
قدو من اعلى ولا من طرف
رميه على صدر لقصيدة
غواية حرف وهواي
نقراني فيه ملحون نون نساء
وفي قلبك حورية ما يطربها غير موالك
[/color]