يوم الفراق

يا لساخي
عينك ما دمعات
يالساخي
عيني انا ماجفات
يوم الفراق
النار في قلبي ولعات
تحرقت الاشواق
الكبدة ...رماد...فتاة
يالساخي
في دواخلي شدات العافية
بيت من النار ...
ولانقوله زوبية حامية
تكدي -تاكل فضلوعي
شكون يطفي
شكون يسوط
ويزيد في هباها
يالساخي
كنتشوى
كنتقلب على جنابي
طبت بصهد حبك
تكويت بنار ولفك
ومازال قلبي فحبك يجمع
ومازال العين عليك تدمع
اش هاد الحب حبيتك
اش هاد الغرام
كيف الباطل
وطاح علية
يالساخي
ياقلب الحجر
دخلت عليك
بكل من صلى وقام للفجر
دخلت عليك
بزينت الليالي ليلة القدر
خليك لاتهجر
على فراقك مانصبر
مانقدر
ها انت شوف
يدي بلا شواري
فيك شادة
شدة العمة لعكازه
ها انت شوف
لرياح بسبعة
تجيني بالدمعة
ونغيب على الدنية
وما يفيقني
غير كاس الهوى
لما يتخوى
على صدري
بارد
كيف الما الدافق من العيون
كيف البير المقابل النجوم
بغيت فيك حقي
بغيت فيك النص
بغيتك كامل
بغيتك لية وحدي
ما يشاركني فيك
غاشي ولاماشي
تكون غطاية وفراشي
تكون انت ...؟؟؟
شكون انت ...؟؟؟
علاش انت ...؟؟؟
فين انت ...؟؟؟