...............مير لمحبه.......

موضوع: ...............مير لمحبه....... 2012-03-24, 04:22

مير لمحبه

يا مير لمحبه
يا الجايل بين لحضان
يا مشخد مجامر لشواق
و ملقم برارد و كيسان
يا غاسل دواخل مصديه
و فاتح شلا بيبان
يا ناسج من عروق لمحبه
درابل لغيوان
سقيني...

رويني...
نغسلني بك من شلا محان
لبسني دربالتك
نزير تحريفتها
نعطر كاسي بريحتها
نسكر...
نتحير...
و نتيه بين السرابات
نحني هذ الروح بضو القمره
نتزوق بهوايش الحضره
و نولي ميرة لبنات
يا مير بالمحبة فك سراحي
تورد دواخلي و يجفل نواحي
يا مير
خيوط الصبر تخبلت
بخر العتبة بفاسوخ و جاوي
الحروف ف دواخلي جدبت
و هوايشها غنات الكناوي
سوالفها على القليب دلات
فوق جماره لعبت العلاوي

يا مير اجمار هاد الليل من ابردها
بغيت ردا لمحبة يدفيني
تتعمر مطامري
و لغاها يطجج النعاس من عيني
يا العالي يا مسخر هاد المير
يا خالق الشجرة و مسخرها للطير

روف علي بالفرحة تعرس ايامي

نلبس قفطان احلامي
الهوى يا مولاي السلطان
تبرز بين هاد لحضان
نجيب لك القليب هديه
يغني و يتمايل ف العشويه
بالفرحة يبارك و يهني
و بدم الجوف يحني
و برح يا مير جاب و جبجاب
هدية من حبيب الحرف
ايلا هي تكتاب
خلي المحبه تزغرت وتشطح
خلي الصبر يجي فوق عوده خيال
و الخيال يسرح اوتاره و يردح
القمرة تدلي سوالفها و تهلل لزجال
تهديها خزانة و النجوم تدق لوتد و تربط لحبال
تحمى الفراجة
القلب و الروح يلعبو حيدوس
و الحرف يبوح يدوخ الروس
ها الوفا جا
شكون جابك يا لوفا
يا لالة جابني الصفا
و الصبر اللي كان علي جفا
يا لالة ها هو اليوم
طالب ف قصايدك الدفا
و الفرحة اللي عطاتني بلقفا
يا لالة ها هو ليوم
تعكز على حروفك
تلقم لوقفة
سعدي سعدي
ضر حروفي
ها هو ليوم شفا

فاطمة الزهراء...

زائر

كيف ديما تبارك الله عليك ونتمنى نقرا لك المزيد

التلميذ احمد السبتي