نقاب نقاب نقاب
وطييييير مع لحروف
قبضت على جمرة المعاني
كوات كفي حروف هبالي
تقلات صروف لقوافي
لحال يلغي بسبع لسون
كالو زمان
يا بحر لقوافي الداخلك
معلق بين نار لمعاني
وبين سبوب لعامس
يحرز ويبخ سطور
مغسلة في طاس بلا يد
ها شبر الطوع
ليوم واكد و غدا سبق
شي يزمم من شوار لكلام
كلاممممممممم
وشي يهترف بكلام
نقاب....... نقاب .......نقاب.........
وصيد حروف
ها لوراق بياض يلشش
هاسمق .. مدكوك كحل
تحث الدف
ها لقلم رقاص
حصل في لعكبة
شاعت خبارو
وفاضت سرارو
نقاب .......نقاب ........نقاب ...........
واااافكاك لوحايل
شكون يزمم
جمرة المعاني
شكون يكر
كاين غير نم وزم حد تم
عين ما شافت ولا طنين لوذن
على قد لحيل
نساوي من وتار لماية لميل
نقش لمكتوب فتية فتية
دارت الدورة
التامرة بهم الدنيا
وتد لحروف
داك وشامو في
وبحروفو
يتسسل مني في
يحلب لمعاني من ضو لكلام
من سوالف القصيدة
الطالعة من جوا راسي
عرق من ساسي
مساوية لقد على قد العفر
الى كالتها كاتني
نطلع لراسي لدهم
نرخي لجامو
نطلق لزناد نبورد لحرف
يمكن نجيبها في تمام
ميات تخميمة وتخميمة
ولا
كلام راشي
وربي شاهد
دم لكلمة عزيز
نكمشني فيه
وشحاااااااال حنينة ديك لحروف
نحزمني ونرزمني فيها معاني
دم لكلمة غالي
بالذهب نشريه
نظفرو كرارة
نسولف بيها
ربيع سكاتي
داخلت عليكم بالقمرة
مرضعني لماليف ما ينقط
ولبا نقطة من تحت
نكول و ما نسي
وعلى كلامي نرسي
وبالسكات نلوك ضرسي
هذا ماكان
نحلب من عشق لكلمة كلام
نقاب... نقاب ...نقاب ...
ونطيبر وحدي
بالي هاني
جمرة المعاني
مدجة مزلكا فيها
حروف فحله
عاطفة على مدادي
نطمها لدواخلي
تبكي و تصيح
يا صلاح لمعاني
جمرة لمعاني؟
شاطت
ولا غير نقب
ودون في لكناش
كرحتني كبدة لحرف
ساحت في عطفة
شعلتني ضو
من شهدة لحرف
من جمرة لمعاني
نقب حتى انا حقي
تحميرة لوجه
ولا نوي صيام
وبسلامكم نحلي
على كف لحرف الغيواني
نساوي عكاز الصبر
نغزل من رموش لحروف
جمرة لمعاني........
الرئيسية 
