حَـــــــــــــرْفْ اللِّــــــــــــيفْ .

أنْتَ شْكُونْ؟ سَرَّكْ غَامَضْ
قُلْ لِي آشْ تْكُونْ؟
زْرَعْتِ فْ قَلْبِي دَمْعَه
بِهَا نْفَكْ خْبَالْ الْكُونْ
مَنْ شَمْسْ أنْتَايَ خْرَجْتِ؟
وَلَّى مَنْ ظْلاَمْ؟
تَرْوِي بَ الصَّابَا جْمَرْتِي
حَارَتْ فِيكْ لَفْهَامْ
فَرَّزْ لَقْوَالْ؟
يَا السَّاكَن فَ عْمَاقْ الرُّوح
الْغِيمْ فَ صْدُورْنَا تْكَلَّمْ
وَالنُّوْ جْفَاه
مَالْ حَرْفْ اللِّيفْ شَارْ بَرْقُو
مَا رَامْ لَ للُّوح
يْظَلْ بِينْ لَوْقَاتْ هَايَمْ
مْخَتَّلْ فَ شْقَاه
شُوفْ كِيفْ الرِّيحْ زَادْ بِنَا
يْحَزَّمْ بَ رْيَاحُو سْفِينَه
يَرْقَصْ عْلَى نْغَامْ سَنْتِيرْ
لْعِينْ الْكُونْ شْكَى سْرَاحُو
يْطَبْ بَ لَمْحَلَّه جْرَاحُو
دَمْعُو كَ مْيَاهْ فَ غْدِيرْ
صْيَاحَكْ مَثْلْ لَطْيَارْ عَلاَّ
وَفْ دَ جْبَالْ حَطْ رْحَالُو
يَحْكِي عْلَى زْمَانْ وَلَّى
سِيفْ الظَّلْمْ دْمَى رْجَالُو
أنَا وَالْجَدْبَه دَرْدَبَة فْرِيدَه
هِيَ رْمَاتْنِي عْلَى جْنَاحْ نَغْمَه
وَأنَا دَرْتْهَا فَ دْوَاخْلِي وْرِيدَه
يا سيَّد لَكْلاَمْ
سْألْتَكْ لَلَّهْ قُلْ لِيَ؟
وَاشْ أنْتَ كَتْبَه فْ جُوفْ لَقْلاَمْ؟
وَلَّى طِيفْ مْعَانْقْ حْلاَمْ؟
ألاَّ..
أنْتَ نَسْمَه
أنْتَ بَسْمَه
أنْتَ كَلْمَه تْحَلَّقْ فَ سْمَا
أنْتَ لَكْنَاوِي..لَكْنَاوِي..لَكْنَاوِي..

[center]كل حرف
ليه فينا معنى ...
الليف شريف
حالف ما ينقطشي ....
غير هو الله يهديه
ف زمان قيل وقااال
عواج ومال ..
وقت الجهد قلال
واللسان طوال ....
شلى كلام مازال ف لبال
تحيتي أخي حميد لنبض حرفك الأصيل[/center]