سيف الكلمة (تعديل)

سيف الكلمة


قلمي يا من فيك زادي وعتادي
ب حق من جعلك تكون
أوّل مخلوق ف هاذ الكون
ب علم وحكمة
وهب لي سيف الكلمةّ
نمزّق كرش الليل
تسطع القصيدة قنديل
يضوّي علينا كلام منطوق
ب لساني ولسانكم ولسان احفادي

قلمي يا من فيك زادي وعتادي
ب حق من رفعك
وعلاّك للفوق
ف هاذ السما المرفوعة
بلا عماد
كتبني على كفني .. و وشمني
ب الحرف غسّلني
ف الورقة دفنني
و اكتبني مع لجواد

*** *** ***

موت ف حياة مكتوبة
وحياة مكتوبة ف موت
وهكذا سايرة محسوبة
موت .. حياة زايلة .. موت .. حياة دايمة

يا ذيك العيون النايمة
يا اللي ف بحور الظلمة عايمة
الكتابة راها نور
قراي المكتوب
يبان لك المستور

الحياة روح خارجة من موت داخلة ف الجّوف يحرّك الذّات
الكتابة بوح خارج بلا صوت مشكّل بحروف ينطّق السكات

*** *** ***

كتابتي يا روحي
قتلي موتي دخلي ف حياتي
فيك وبك نلقى راحتي
نجمع شتاتي و نعود ل ساحتي
راه ورقة جاتني ملّثمة ب كتابة
ناقشة ب حروف جذّابة
و تقول :
أنا ورقة ف غصن طايح من شجرة
والشجرة ف الغابة
فيها النار طلقت لسانها
هو والريح يلعبوا حابة

أنا ف عار نقيطات الما اللّي ف السحابة
أنا ما بغيت نكون ورقة ف عود
من عواد الحطّابة
ولا ورقة ف عود من عواد الشطّابة
أنا بغيت نكون ورقة صالحة للكتابة