مرابط لحزان

[c[center][size=24]]مرابط لحزان

لجمت عاود حيرتي وسرجت لعوام

بكات خدود العشرة على رواح ليام

راحت البسمة بين مرابط لحزان

عويل ليام تتني ريحي على لبطاح

ويل جحادي تجني بدور لطلاح

والشاقي يسقي من سواقي محاسني

سالو عنو لعواصف الكامدة فدخالو

مشامم الشوك على عنقو دهاز

غربلو سماه من ضبابو الحايل

فكو وحايلو من التخزاز

سواد الگلب حيرة ظفيرة مفتولة وتنغاز

لا صبا فالعقول ما جناو حروف لا كلمة تعزاز

فياق الرگدة عداب كلامهم فظهري منغاز

شمرت الشوفة بلا قياس لمطارق بين ضلوعي ملفوفة

الكير وشام فلبدان ضايق لمرارة ولعقل درباز

جرحو گناطر لمعقول صبغو العادة

والماضي ماضي و اليوم دواخلو حراگة

شفار النحس دلات وزكروم الحالة يزگي

والحمامة ضللهاعنوة بجناحو الباز

ايگولو للهم تعالى يلعبو بالفلس مالة

والعادي گادية نيرانو ما صاب مقالة

من شمر كتافو ولبس لحافو لهمو حاز

كفنو المعنى تكفات حروفو و الكلمة مهبولة

ماحرسو تراعي ما صفاو مراجي ما صلحو المعطولة

مراكبهم عرجة والغادي فيها تاه ما جا

من هنا گالو خياتي خيالو داز

تنفخ الراس بريح الوسواس

حضرة الزعامة بدون ساس

من بتر بلعصيدة الباردة بيها فاز

كحليت باسو نخصة فغصان الگلب تراري

قصحيت راسو خرصة فباب ارتاجو راشي

صدات عماقو ظرسة مسوسة

وريق انفاسو كلمة تخناز

حمريت نجالو دم جاري غادي فمجاري ليام

بكات يامنة على ايامنا

نشفات الساگية لا برومي گادي ناري

لاضباب فسمايا لا خير جاري


مع هبوط الشمس طلعت لقمار باكية

راكبة مركب لحلام والنجوم مني لاغية

زارني فمنامي شيخ الما هاز علامو

راكب مگمط الما رافع سلامو

عينيه عين راوية ودموعو شلال

فمو بير عميق كلت فيه نتيق

ايديه فجاج انفاسو عجاج

كلامو ريح يصيح بين كتافو

تنهادو رعد فلجتو بياضها مشهاب

شير بحزامو كترات اماجو

اغيز ضبابو اجمع نگطاتو

اشرج هياجو يلجم غروب الشمس

شهوبو ارجم سرح جناح السما

نزل گطراتو مرايا

خيالو ما من غدير ايامو

ارمى شوقو فسوقو اردم

نجمة طلت عليه سقاتو ضو

سقاتو همة كبر صوابو

شيخ الما وزع الما

مراجي مجاري مطافي ورد الغمة

نبتت قوال بظل الما

لبسوه خيال بان خيال

قادر على لخفى

هدونو سراب مشيتو بالحفة

يروي لحكاية من عماق البير

ادري نداه ترابو سراد تعية كتافو

يغرق فغيسو ينشف السراب

اسبق الزمان يتلف مصارف

تبان صيفاتو ايام تتخالف

والشيخ يبقى شيخ فظن المعارف

تحرك رعد اشكى

مرى البرق الشوفة خطفها و زاد

ندات الريح ع الريح تلفات لمنازل

تكلكم شيخ الما فمجاريه

طاح نقطة نقطة غسل مدامعو عمر العين

صفات لگلوب دابت لجراح

سالت لفراح زاد الواد هواد

رحيلو حجر وتراب وعواد

تفجات عين الرحمة

نبتت سمرة فقاع الما

كبر الموسم حنات غنات الخيل

جدبات فطلوع الليل

اركبني لهواس

مدو لي طاسي نغسل هواسي

نبيض نحاسي تكبر ليلتي

فياقي هو نعاسي تسهر حيلتي

نگلب ليام تظهر صفحاتي

ننقش فيها تنهادي نكوي علاتي

نكتف حروفي بخيوط المعنى

نلجم عاود حيرتي نسرج لعوام

بقوس الفهامة تجرحت لعباد

حلفت النعامة ماتعاند صياد

تبرد نارها تحت التراب

تخلي داتها موشومة عداب

ومرابط لحزان دايمة على الدوام

تنقشات فالگلب نقيش الرخام

عبدالرشيد عمهم

شكرا اخي الكريم محمد بوبكر على مرورك القيم تحية زجلية خالصة اتمنى لك التوفيق والنجاح