مات لغرام ميمون الغازي

مات لغرام




شْحالْ داويتْ
داكْ الجُرحْ لعْميقْ
كيفْ البيرْ
المحْفور فْ ساس أعْماقي
النابت غرس
وَسْطْ حوشْ الدّار
أنا مَا سْقيتُو
سْقاتُو ليّام
"ماحَدْها تْبيضْ وهيَ تْقاقي"

يا قلبي..ساعَفْني
كونَكْ رمّانة مغَمْضَة
تَدْفن حَبها فْجوفْها
إلى تْقيّح
تيبَسْ عْليه

ما تْكون سْبولة
دارَتْ
من الحبّة قبّة
دارَتْ
حْقولْ وفزّاعة
وشلّى صْداع
ما تقْدرلا انْت
لا أنا عْليه

يا قلْبي فينْ دْواك
وشْكون هْواك
النّاسْ غارْقَة مْعانقَة..
حْبيبها الهَمْ
ما تقْدرْ تْواسيكْ
أنا مولاكْ
وكيْف تنْبضْ فيّ
نْحسْ بيك

أنْت عْڭدْتْ
هذا لغْرام خبّلْتو
ما نْقولْ ليكْ
فكْها بْسنّيك
ياكْ أنْت أنَا
وأنا أنْت
انْت ديتْني لْبحْرو
نْعمُوه بيديّ ورجْليكْ
إلى غْرقْتْ
ما تبْكي عليّ
إلى مَت
مسامَحْ ليك
وإلى متْنا بْ جوج
تهنّى لغْرام
بيّا وبيكْ

ميمون الغازي
نيس/2011