أستادي الزاوي ادريس بمناسبة صدور ديوانك الزجلي الأول لا يسعني الا أن أشد على يديك بحرارة و أهنئك على دلك الزخم الشعري و أرجو أن تقبل مني هاته القصيدة المتواضعة عرفانا مني لكل ما قدمته لي من نصح و ارشاد لكم ولكل من ساعدني في مسيرتي الزجلية,
مرسال الروح
يا لمعلمني نجان لحروف
الحال من الحال
بلاش عليا من لومة
بارية و مبرية
ماني متهومة
عذروني حالي بغزيل
المعنى مريوح
رحموني يا هل الحال
ياك أنا وحدي
شاربة ريح اهبالي
ندوي
فرادية وسط لحيوط
شكون يورني راس الخيط
شكون ياتيني بساروت لفتوح
شكون يريب هدا الحيط
تبرق شمسي
ضو ف سمايا يلوح
جيتي انت
وقفت لي منول لقصيدة
على حد الشوف
السطور, سدا في سدا
قلت
الحروف هما العكدة
لكلام نجان
ركمة, صورة
المعنى معبورة
العين ميزان
لودنين هما الصروف
,,,,,,,,,,,,,,,,,,,,,,,,
يا مساوي خيط الريح
على جبين هد الروح
قلت اختي
فرحت بك خويا
طفت بي قبايل اللوح
على منسج لقصيدة
ساويت لي خيط الروح
فتحت لي عراصي لقوافي
سرت نتنزه و نطوف
من ازهار أشعار الزجالة
سقيتيني رحيق لمعنى
شديت منك عهد الكلمة
علي ب لحلوف
نكون خديمة لحروف
مراية روحك
كانت مرسال الروح للروح
فيقت في لكلام
و رتني روحي
ف مراية ليام
حررات شمشي من لغمام
طلقت طيري ينشد شلا نغام
بديت حتى أنا نرشم
و نحاول نركم
على منسج لقصيدة
تبورشت روحي ف احلام
و مني ليك ألف وألف سلام
الخياطي أمينة