صــوفْ البردْ

صــوفْ البردْ


من صوفْ البردْ

قرشلتْ صوفي

غزلتْ منها خيوطْ

فوسطْ ْالعجاج

رْميتْ المنسجْ

رعدة تسدّي

ورعْدة تنيّرْ

مْناولي رْميتهمْ

وسطْ الرّياحْ

ريحْ تجيّجْ

وريحْ تجيبْ...

من خيوطْ حلامي نجّيتْ

زربيّة اركَامْها

قوافي و حروف

تلوحْ الخوفْ

الوانها ميزان وصْروف

طـُولها ما يحدّو شوفْ

طْلقتها فوقْ اجبلْ معروفْ

جمْعاتها ارتيلة فكهوفْ

توسّلت لها تـْروفْ

اعطاتني خيوطها

اغـْزلت لـْباسي

ما جا على قياسي

قصدتْ محبّتْ ناسْي

مانعاني ما نقاسي

لقيتني عريانة

مكسية ب هواسي

من راسي لـْساسي

ورّيوني آشْ نديرْ؟

فهادْ الحـــال...

زيدي أ ليّامْ جيّحيني

كتـّفيني بخيوط لوْهام

ديري من خيوطكْ

مسامرْ وقطبانْ

مسامركْ غرسيهمْ لي فلكْدامْ

يحبسوني انزيدْ القدّامْ

وقضبانكْ

بني بهمْ سورْ عالي

وْزرّبي بهم تابوث خيالي

وبمضى سيوفكْ

جرحْتي لحلامْ

ونهشتي فيّ ظفاركْ على الدوامْ

روفي عطفي وحنـّي

خرّجيني من لوهامْ......


أمينة الخياطي
10.03.2011