ميمية الصمت

موضوع: ميمية الصمت 2011-09-08, 10:18

قلت لراسي آشنو زعْمــــا

حتى لين ولساني حْصان بْاللّجـام
جاوبني وقال : ما حسدوك الْبكْما
وحْلاوة لكلام في قْلّة لكـــلام
من فمّْ الثرثار تْعلّم الحكمــــا
وارْخي لُوذن إيلى سابت لفَّـــام
ف ميزان الذهب دْقّق الْكلْمـــا
وتْقنْطر بْالصّْمت تولِّي عْـــلاَّم
الصمت لُغة وحْيا وحشمـــا
وسْلامة وصُوم وخير وسْـــلام
ولكلام الزّايد كتْبة فوق الْمــا
والقول بْلا فْعل ما يهزّ مْقـــام
لا تسكت عْلى مْناكر وغمَّـــا
وأَمَام الباطل لا تكون تـمْتــام
وعْلى حقك ادْوي واثْقب السّْمـا
وعْلى ساس الصّح تـبّث لقـدام
وازْند عْوافيك من تحت البرمــا
وقفّل كسكاسك يْفور الطعــام
من فوق الشبعة لا تْضيف لقمـا
تورّطك ف وجعة وعلّة وسْقـام
.....
قلت لْراسي كفاش زعمـــا
واشنو قصدك من هاذ لكـلام
قالِّي تْـعلّم تْحط البصمــا
وخبِّي هْبالك وفجّر لقــلام
اطْلب التسليم تْشد ف النّجما
يْطيحو سْيادك من تحت لقدام
سِير حْويطة و فُوت الزحْمـا
وحطّ عْبارك وافي بْالتّمــام
تْقوّْس ونيّش ف ضيّْ وظلمـا
رخّْم الحرف وْلا تْخاف مْلام
وفرّْق لْغاك يـجْمع اللّمَّـا
يْفرّق الجوقة مْع اوْلاد لحرام
ويلى تْكلّمو بْواق الغشْمـا
اقْطع الزَّاي بْمُوس الحجَّـام
واشْرب صمْتك بْزايْد جغما
واصْغا وتصنّت بْعقْل خدَّام

*