عدي يا ابن عدي

هاذي شهور وعوام
واحنا ماشين مع الغيام
حايدنا التخمام
نسينا الأحلام
وبقينا نسلكوا فالأيام
كل يوم يعدي
يخلي النار فيا تكدي
كلما دويت مانسمع
غير عدي يا ابن عدي
أنا نعدي وانت تعدي
وشكون يعيش الأيام
اللي سايرة تعدي؟
آجي انت,خوذ...هز...ادي
وانت...إييه انت
ماتهز...ماتحط...
غير سير عدي
باش نعدي يا ابن عدي؟
واش انت تدي
وانا نمشي نعدي؟
يمكن أنا نضحي اليوم
وهاذ اليوم يعدي
لكن غذا...آه من غذا !!
محال واش يعدي
لباسك, اليوم
مابقى يجي قدي
والسلك اللي كنا
نسلكوا بيه الأيام
لابد شي نهار يصدي
واش هاذ النار
تبقى غير فيا أنا تكدي؟
جرب حتى انت شي نهار
تعدي
وشوف شحال من محاين
كنقاسي
بهاذ الكلام
ديال
سلك وعدي