جاري ياجاري يا الفاضح اسراري

جاري يا جاري
يا الفاضح اسراري
ياك سديت عليا داري
وعلّيت ليها لسوار
علاش خرجتيني من غاري
وفضحتي ليا هاذ لسرار؟
ماشكيت ليك بضراري
مارميتك بحجار
مارميت عليك عاري
ما احبست عليك امطار
واش حيث انت للدار كاري
وانا اللي شاري هاذ الدار؟
أو حيث أنا عندي الدراري
وانت هربانة ليك مولات الدار؟
بغيت غير نفهمك ياجاري
باش نبردوا صهد هاذ النار
ونفتح ليك باب داري
ونهدموا هاذ لسوار
والدم يولي بينا جاري
وماتبقى بينا اسرار
انت زعما راك فاهم وقاري
وعلاش أسيدي هاذ لغيار؟
قرب احدايا وجلس جواري
وخلينا نطفيوا هاذ لجمار