والله ما حنا ناس

والله ما حنا ناس ما حنا والو..
عينين وفم وراس والمخ والو..
والله ما حنا ناس ما حنا والو..
آلگنازة لابسة لباس والگلب والو.
القاضي يِشَدْ الرشوة،
والمحامي يِدُور يتلوَّى،
والمظلوم ما فاهم والو.
والله ما حنا ناس ما حنا والو..
المريض شَادَّاه الموت،
والفْرَامْلِية يْحَلْبُو فالخُّوت،
والطبيب ماديها في حالو.
والله ما حنا ناس ما حنا والو..
الوزير قاضي حاجة،
والنَّايب شلاَّ ما جا،
والشعب ضاع في ديالو.
والله ما حنا ناس ما حنا والو..
المسكين يدور يِتْلاَوَح،
والغلا دار فينا جناوح،
والبلا حتى هو بحالو.
والله ما حنا ناس ما حنا والو..
الخمر يتباع بالعلاَّلي،
والقْمَرْ بِعْلاَمُو يشالي،
والرِّبا خْلاص لا تسالو.
والله ما حنا ناس ما حنا والو..
الأولاد كُبَّة من النعاس،
والبنات في العرا بلا قياس،
فِينْ ما ضارو يتكالو.
والله ما حنا ناس ما حنا والو..
التربية بدلت التَّسْمِية،
والمدرسة ولدت الأمية،
والحْيَا حَيَّد سروالو.
والله ما حنا ناس ما حنا والو..
السَّرْقة في كل جهة،
والتْبَرْگيگ في ديك الجهة،
والقمع مَادْ حْبَالُو،
والله ما حنا ناس ما حنا والو..
السياسة لبست المصلحة،
والعدل تشرَّح في مشرحة،
والحق تَـمْ اغتيالو.
والله ما حنا ناس ما حنا والو..
الواسطة دارت بلاصة،
والكلمة باعت رَاسَا،
والصدق مْشَى فحالو.
والله ما حنا ناس ما حنا والو..
اللَّحْيَة صارت مَدْغُولة،
والمُسطاج خَاصَّاه رجولة،
ولالة، قالت ما تعرفو والو.
والله ما حنا ناس ما حنا والو..
النصارى تْجَبّْرو علينا وطغاو،
وليهود دارو فينا ما بغاو،
والمسلمين باعو كلشي بْوَالُو.
والله ما حنا ناس ما حنا والو..
العُرُوبة گُلَّة مثقوبة،
والإسلام طريق مَسْلُوبة،
وَحْنَا والو فوق والو تحت والو.
والله ما حنا ناس ما حنا والو.
.