مراية الـــروح

مراية الـــروح



إيلا كانت الكيَّه ف الـﭭلب زاندَه
ع لوجه يبان دخّانها
لوذن حاضرَه
والعين ما هي راﭬـدَه
واش الشاعلَه فيه
بحال اللي تيسخن عليها ؟

********************
اعطيني وذنيك ، استلغى لولهتي
عفـــــــــاك
راني ف شوفه منك طامع
خليني نسمعك على اوتار ضليعاتي
تزنزين خطيوات الدالع
ف اسواق راسي دالع دايع
ف اسواق الدنيا ، ماني شاري ماني بايع
بحال شي بنادم غادي عادي
ما نأدي ما نحاذي
نصبـح هابـــط
نمسي طالــع
بحال اليوم اللول
بحال السابع



ف قفص ذاتي مسجون
بين سواري الكــاف و النون
فيضت النيَّه غطاتني الغبشيَّه
طحت مع راسي نتشارع
نتلاوح بين البارد و السخون
لفكار ما لقات راحه فين تكون
يا ما جراح الروح دمات
و أنا بارك عليها ب الترقاع
واحد من سلالة بني غفلون
ف قشور ليام راتع



هرتــني نفســي
حسي مســي
ضحكت على صورتي
الــواقفَه قبــــالتي
ف شقوف مرايتي
بين الشكلي و العكلي
آش نسبق ؟ آش نتلي ؟
كيف نفرز راسي من ظلي ؟
كشفت صورتي
وبهات اللون
سولت راسي أنا شكون ؟
شكون أنــــا ؟
أنــــا شكـــــــون ؟


أي يا يـاي
بحريق التسوال
لسان النار ف الدواخل طوال
الجوف ﭬـدرَه و الراس كسكاس
الـﭬلب هبرَه سخون
ب الجلبه دمو مساس
الفم شبع هدرَه
تقرقيب الناب طيح الضراس
الريق مدرَّح غبرَه
اللسان عاب ولى كِ دﭬـاﭪ المهراس
ف لبصر جمرَه
الشفر طاب و ما طاع النعاس


أي يا يــاي
يا حريـﭫ السؤال
شكون أنا ؟ أنا شكون ؟
ما حد الشوفه تتبهات
نور لبصر تيقلال
ف ربيع لعمر نوارة الروح تتذبال
بصريط غنان وطريد الدخان
السلسول سكَّه
لعروق طرﭬـان
هكاك نِّيتْ معاكس الريح
نبرِّي على عنوان .

ما حد النظره تتحرار
الخاطر تيضياق
ف الـﭬـلب شحال من مسمار
عاطي راسو للتطراق
ساعفيني غير مرَّه يا صورتي
طلـﭬـي اللسان
ب الشهـــاده يبـــــوح
ياك لوجه مراية الروح
و الروح يمكن تشهق
ف أي ساعه و تروح


باهتَه
يا سيفتي ف مرايتي
م الـﭬنه للفركوح
كادر لعظام تابوتي
ما فيَّ غ ﭬـلب يزدح
بغرام الكلمه مجروح



يـاك آ لكلمه يــاك
وخا وقفت ركيباتي
وخا بدلت كساتي
وخا عوجت الشوفه ف مرايتي
ما بقى ف السر ما يتخزن
بين الشن والطن ف حال مطنطن
بوزلوم ... شقيقه و لا بومزوي
وخا بردت كيتي
وخا داريت ليعتي
وخا طويت صورتي
مع وريقات المخزن
ف بزطام لاوي
مبرع ب الشيك ،
شيك لبيك
طلع لحساب خاوي


آ آ آ آ ه على ايام مشت م لعمر
آحْ من اوقات جات
ف ذاتي تنــــجر
وأنا نصبر الليعات ب حساب الشهر
عام يلوحني لعام
و أنا غادي ع لوهام
نتشعبط ف تليس لحلام
نجرجر خطيواتي ف طرﭬـان
كلها تلاوي
نـﭬدي اوقاتي ف دنيا
مخبلَه ب التْناوي



شكيت ف ناسي
تنويت حتى من راسي
ف دكوك القهوه طمست قرايتي
تسحليت السؤال يسخسخ ف حالتي
حتى خفات علي صورتي ف مرايتي
إيوا شكون أنا ؟
أنا شكون ؟


أي يا يـاي مزود الضر ثقال
عييت وطبت ب التسوال
النيف بلع دخان الشهقه على الريق
العين ﭬـالت للمخ خلاص فيق
فرَّكت حموم الشوفه
ﭬـلت نشــــوف
نروي عطش النفس الملهوفَه
يبرد الجوف
أي يا يـاي آش يعجب الـﭬـلب
فيما يشوف
بين الكسوف و الخسوف
شمس الحق منتوفَه
ب نبال لغدر مقدوفَه


أي يايـاي هذ الزمان آش تحت راسو ؟
كلها يـﭬـول راسي
و انا شكون آ راسي ؟
شربني هوس الحال
سقاني تخت كاسو
زند نار اهواسي
علاش و كيفاش
هذ لمرايه لابسَه الطشاش ؟؟؟
الضحكه صفرا والنيَّه ما تماش
حتى لين
يا الراس العاصي
و انت ف سراب الوقت عطاش ؟؟؟



سرحت الشوفَه ف الدواخل
ﭬـلت نشوف
دبت الروح ف رموش العين
غمزتني عيني ف مرايتي
شفت كفي
بانت لي بيضا
محها حروف
سرَّجت عقلي
ف شعاب الخاطر نبات تنطوف
نتحسس خطيوات الموري ف سكات الليله
نفتش على حرف عزري
تكون له الورقه خليله


غمزَه هي ف حلال
نغزَه هي من عين الحال
طلـﭬـت سراح الروح
ف قراية وجه الحاله
ساحت هذ الروح
مرَّه تسها ف شون الخاطر
تسيــــح ... تسيـــــــــح

مرَّه تصحا ب الحرف تسافر
تصيـح ف وجه الـــريح
تـصيــح
عليكم تصيـــــــح

يا حاسيينها فينا
محنه على الدوام
يا ناكرين الدم
يا نادسين ملح الطعام
يا قاريينها عوجا
يا محرفين لكلام
يا مخوضين ترابينا
را العـــــيب فينا
زايد يكبر عام على عام
و حنا مدرﭬــين وجوهنا بغمام
معلقين الرجا ب اوهـــــــام
ويزيد العيب يكبر و يكبر فينا
عام على عام

تيفلت 1998