الواد الهرهوري

هاذ الواد هرهوري
يصدح بما فيه و بيه
و الآخر سكوتي كامي ما فيه
بين السكات و الهضرة
نابت الخوف
طوال وردو على حد الشوف
مسقي من عين حارة
كل شي يهتف
كل شي يشتف
على بطانة الخوف
كل شي يهتف
كل شي يشنق
وردة الخوف المارة
أجي نكسبو الخاوة مع الصفا و النية
أجي يا وا نغبروا لهاذ الخوف الشهاب
و نرميوا المنداف للذياب
بغيت منك نروى
نتعلم الهروب و الجفا
ندفن القلب ف صخرة
يعيش و سط الظلام و القهرة
بغيتك تحس بمحايني
تغسل قلبي من الصدى
ف مطفية الايام
نسى الماضي و اللي كان
كحل عينيك بهاذ النور
را الزمان دوار
اليوم لابس جلابة سدا ف سدا
و غدا سلهام الحبة
و ف الغبشية جلابة ضرعة
و مين الطريق عليك تطوال
يولي الزمان غير حاضيك
نت تلهت بلا جري
و هو يزمم ف الكناش
علاش و كفاش و باش
هاذي زلة
هاذي فرحة
هاذي دمعة
هاذي ضحكة
تصالح مع الزمان
صونو و صونك
عونو يعونك