ضْفيرة السّر .... زجل

موضوع: ضْفيرة السّر .... زجل 2011-03-30, 13:44

لْساني بالمحبة لاهْج

خارج عْ لْمناهْج

فاتلْ لْكْلام

عْذاب و غْرام

وْ شلاّ حْوايج

و لْقصيدة

ضْفيرة بْسبْع لْوان

ولاّ تْمْنيَة

سايْلة من طرف اللسان

عْزبَــا

مْحْنّْيَــة

بالفرحة مغطّيَة

و لْهيه

لهيه

تْساينْها لْحزان

سْـرّك فالمحبة شاعْ

و حْروفك قْبيلة

قْصيدة هْبيلة

زغْرتَاتْ

قبل ما تبدا الليلة

عْـــنادكْ يا آنَــايَا

ف دواخْلك ساكْنّي

مْلتَاعْ

كلامك غْــنَــايَا

مْطرّْزْ سْمايا

بْ اوْشَامْ السّْؤَالْ

رْكَادْك

يْلاَ خْفت نْكذبْ

طَــالْ

زَادكْ هْـبَالْ

و هْبــــَـــــــال مْن زَادْ

فْ زَادكْ

شْمّيتْ نُوركْ

زحفت لُو

عْلى رْمُوشْ خاطْري

حْرْقْني رْمَادْك

طْلْقْني

يْمكنْ ذيك السّْـما الواشْمَة

يْجُودْ عْليّا سْحَابها

تفتح لي دفّة

مْن بْوابْــها

نْتلذّذْ بْ اعْتابْــها

هيَ تْـعرْفني

يْــلا فاض السّر

طُوفَــان

سْفينْـــتي مْحرابْـــها

موضوع: رد: ضْفيرة السّر .... زجل 2011-03-30, 13:52

هاد حرف ضاوي لازم نجيب حرفي لمخاوي باش نرد عليك
تسناني يا كاس لمعاني..

موضوع: رد: ضْفيرة السّر .... زجل 2011-03-30, 14:01

كلامك رزين يا عادل تنتمنى ليك كون من النجاح الزجلي