صداقْ الزِّينْ

موضوع: صداقْ الزِّينْ 2011-03-18, 11:49

عْتبة وشْلا تعَاويد وكْتبَة

كلمة تعلِّيك،كلمة تخلِّيك فْ نْص الطريق،وكلمة تفيْقك فْ نص اللِّيل،
كلمة تهْدمك،كلمة تنْدمك، وكلمة تگدمك، تدير فِيك بْلان
كلمة تكُون لِيك عْتبة، تخلّيك تتشعْبط فْ درُوج الكْتبَة
وكلمة تشعْل فِيك حْريق، تْدير فِيك طْريق، كلمة تْدير فِيك الهْم، كلمة تدير فِيك النّفْس
كلمة تكُون جْوابك، سْبابك.. تْجلِيك، تغبّركْ
كلمة تكُون لِيك گبصْ، تداويك، تجبّركْ
كلمة تشْعل عَافْية، تخلِّي الرمادْ..
وكلمة تنْزل دافْية، تكمْدك تكمادْ..
كلمة تصفِّيك.. كلمة تخوّضكْ.. كلمة ملِّي ترگدها تنوْضكْ..
كلمة تدير ليك جْناح، تردك طِير حر، وحْم الكتبة گايْدكْ..
وكلمة تخلِّي اللِّي ما شْرا يتنزّه، سَاهي فْ درُوب قْصايْدكْ..
كلمة تخلّيك تطُوعْ، وكلمة تتْشهَّى غِير تشُوفْها، واخّا زيّها مگطُوعْ.
كلمة توگف البِيضة فْ الطّاسْ، وكلمة يخصّك لِيها غطّاسْ، وشُوف وشُوف واش يدركها..
كلمة إيلا خْطاتك، مْلْح الكتبة يوگف ليك فْ الركابِي،وتشُوف گاعْ طرگان لقْصِيدَة عْگابِي..
وكلمة إيلا عْطاتك،حفّن بيدِّيك بجُوج،عمّر مْطامْر وخْوابي..
كلمة تورِّيك گاعْ البْرّ مْواطِي...كلمة عْمّرها تخلِّيك تْطاطِي...
واخَّا تتهْد، ويتخوا لخْـزينْ..
تْقْنِي لِيها فْخاخْ
تْعكّلهَا
تْشكّلهَا
تـگُول : هذا صْداقْ الزِّينْ..

موضوع: رد: صداقْ الزِّينْ 2011-03-20, 07:48

" صداق الزين"

رؤية نافذة إلى عمق الكلمة
بل إنه تنظير ممنهج للكلمة كما يراها
زجال يعرف حق المعرفة خبايا و أسرار الكلمات
و قد ربطها حميد عسيلة برؤى و أشكال تختلف حسب
مجموعة من المعطيات منها ما هو ادبي و منها ما هو تأملي
لقد وجدت حميد عسيلة هنا يقتلع من عمق تفكيره
رؤية واضحة لعلاقته و علاقتنا بالكلمة|الكتابة

شكرا على هذا المستوى الراقي
محبتي خويا حميد

موضوع: رد: صداقْ الزِّينْ 2011-03-20, 13:32

الأخ الفاضل حميد عسيلة :

كلمه وحده خويا جيت نقولها لك ، تبارك الله عليك
و الى مزيد من الابداع و التألق حتى نبلغ الرهان السمو بالقصيدة الزجلية حد النظر لا النضر

موضوع: رد: صداقْ الزِّينْ 2011-04-04, 07:24

الزجال و الصديق حميد سلام من مازغان لك و للغالية كريمة..

حروفك أخوي مسكَدة منكَدة، تفيق الناعس ،تخليه يغزل من الحروف وسادة...

تقدير و احترامي....