لَحْماق بعيْنِيه و الحيط بوذنيه

من عام... أنا راجل ناخذها كتشعل
شعلت العافية
واللات هْهه الشاعلة... كتشعل معاه
شعلت مع أفكارو
اطفات حلاوة نارو
واللا ف رماد الوقت
يساين كفن نهارو
من ذاك العام
اشعل اللي شعل
و اطْفَا اللي اطْفَا
شعلت الأسسسسعاعاعاعار
واللا اللحم حشيش كيتشم
سرّح مناخرك و شم
عنداك تقرب...
لا جيبك يحشم
و بزطامك هْههْ يتّخدمْ
إيلا دختي شد ف الأرض
مرة مرة الدّي ولدك يعري على نيفو
نهار يتعَوَّد ...
ها السِّليسيُون...آرا ما يشم
و ف اسْعايه و السرقة يولي يخدم
و انت يا مسكين
درّب راسك على طلوع الدم
ويلا ما عجبك حال
موووووووت
موووووووت بالسم

من عام... ابْغ يشعل معاها ...شعلت معاه
الأسْ سْ سْ عار عاااار
شعلت مع النيف المهزوز
مع النفس الحارة
مع الجيب اللي ما زال ف مِيكتو
مع مول الصباط البايت عند الخراز
شعلت...
و حمات السوق
احمات الطرح...

حامية حامية...اللي ماحماها تقطع يدُّو
حامية حامية...اللي ماحماها تقطع يدُّو


اتقطع الخط اللي كان يربط
اطْفَا الضو ف نهار مشمس
تحركْت القلوب
واللات الدنيا حْ حْ ححح ِريكْ


و عطاوْها للحريكْ
اطفاهم البحر
اشعل مع كبدة الوالدين


هذا حراك
هذا احْركْ
هذا ناوي...
هذا هزو الما
هذا بااااااع....باعْ
رزقو...


اللي خلاوْا الوالدين من لعشا
كلاوْا شوية و خلاوا لغدّا
حيت غدا غوووول ساكن من الصغر

كبرنا...

و معانا كبر
يخلع عْع ع فينا
يقطع حْ ح سْ س سسْنا إلى ادْوينا
شششششششش.....
دوي ف كرشك
عاود لراسك
ادخل سوقك
الهضرة بزاف و اسكات احسن
اسكات حكمة
اتعلّم من ههه البكمة
إيلا محْحححح محْ تااااج
اطلب من الله الرحمة
واللاّ ...
عاود لمخك إيلا مازال ما طار
ويلا طار...
اشرب لبحر


من ذاك العام....

ما زال الشمع شاعل ف السادات
الذبيحة محمرة وجههم
البايرة واللات بالعكاز
المزوجة تبكي على سعدها الطافي
مول الدار احْرك لدار اخرى

الولد يشاطي مع الكاوريه
خاف يحرك و يتحرك
و الحراك بفلوسو يحرك
أمو ف أخّر ايامها تسقي على الحمارة
و هو مقابل قبلة الشّاطْ و يتْيَمّمْ بالفارة


ها هو با يشعل
ها هو با يطفا
ها هو با يشعل
ها هو با يطفا


حامية حامية اللي ما حماها تقطع يدُّو
حامية حامية اللي ما حماها ي ت ق ط ع طع...(.)
.....
...
.
تحية و تقدير لك أخي السعيد
لأنك استقبلتي حروف إلهام بمشموم حروفك الرائع
جيت ضيفة لعندكم و وقفتي اوتاد خيمة الزجل لحروفي
شكرا لك أخي
تحياتي