ساكن حزامي

موضوع: ساكن حزامي 2010-07-12, 20:14

[center]سَاكَنْ حْزَامِي

عَادْ سَاوِيتْ كْتَافِي
وْنَاوَلَتْ لَحْمَلْ
مَشْيَة فَصْوَابْ الحِيرَة
تْنَاوِيلْ
بِينْ الِّليلْ
وَالجَبْهَة
سْلاَمْ بَاهَتْ
مَخْزُونْ
مَرْهُونْ
مَفْتُونْ
فَعْشِيَّة بْلاَ صْبَاحْ مَغْزُولْ...

مَا يَهْبَشْ غِيرْ الْهَمّْ
فكْنَانَشْ بْلاَ دْوَايَة
وَلاَ قْلَمْ
بْغِيتْ نَفْهَمْ
فْرَكَتْ جْلاَلَةْ الْغِيبَة
فْرِيكْ الدَّزَّة الْمَضْيُومَة
فَتْعَاوِِيدْ الْمُغْزَلْ
لَلْقُرْشَالْ
خْيُوطْ رَاشْيَة
مَجْدُولْ...

عَنَّگْنِي حْزَامِي
صْبَرْ
وهْدَرْ
بِينْ الجَّلْدَة ولَعْظَمْ
وْسَلَّمْ فَجِْبيدُ
تَعْنِيگَة
كَمّْدَتْ
السَّاكَنْ حْزَامِي
تَخْمَامْ رْهِيفْ
فَالشُّوفَة مَهْبُولْ ...

نَهْبَلْ
اِلَى كَانْ هْبَالِي
سَارُوتْ قْفَالِي
وَاگْفْ عْلَى بَابِي
نْحُلّْ فْغِيبْتُ بِيبَانِي
سْمَا مْشَرّْعَة فْدَقَّانُ
جْوَابْ مَعْلُولْ ...

قَرْصَة مَنْ لَحْزَانْ
وْلاَ تَمْشِي فَالْتَة
مَنْ زْمَانْ
كَابّْ غْيُومْ نْدَاهْ
كْذُوبْ
وَشْمُوعْ
مَاطُّوعْ
غِيرْ فْتِيلْ الشَّمْعَة
بَهْوَالُ مَفْتُولْ ...

كِيفْ هُوَ حَالِي
فْحَالْكُمْ
يَعْطِيهْ الدَّا
بَعْدَة وَاشْ عْرَفْتُوا
بَالِي فْصُورَتْ حَالِي
مَشْدُودْ
بَلْسَانْ الْبَارَحْ
حَطّْ لَعْذَابْ للِّي جَايْ
فُوگْ للِّي الفَاتْ
بْخَطُّ كَاتَبْ
غْرَامِي فْلَعْذَابْ
عْدُولْ ...

كْفِيوْا هَادْ لَغْطَا
قُبّْ جَلاَّبْتِي حْدِيثْ
إِلَى صَبَّتْ كْتَافِي
عْرَگْ
كَرْبْلُوا تْرَابِي حَرْثْ
يَنْبَثْ
الْمََا
فَغْيُوْم السّْمَا
الْمَحْرُوثَة
بَسْوَاكَنْ الْعَلْوَة
وگُولْ أَشْرِيفِي گُولْ...

شْرِيتْ كَفَّة
فَسْلاَمْ لَخْفَا
لَكْفُوفْ سْلاَمِي
عَفَّةْ
كَفَّة ذَابَتْ
وكَفَّة بَرْكَتْ تْعَاوَدْ
بِينْ سْنَاسَلْ "الصُّورَة"
شْعَابْ مَهْبُولَة
فِيهَا غْرَايَبْ
وغْرَايْبِي زْبِيبَة
بِينْ خْدُودِي تْجُولْ...

وَرّْدَتْ هَادْ الْعَفْطَة
مَنْ تْرَابْ الدَّنْيَا
عْطَشْ..
وْمَا رَشِّيتْ لْسَانِي
يْفِيضْ رِيقُ
بَكْلاَمْ
يَنْوِي صْيَامُ
فَصْبَاحُ مَحْلُولْ ...

حَالَتْ ظْفِيرَةْ
هَادْ الخُشْبَة
مَنْ جْدُورْ لَوْهَامْ
كُونْ كَانَتْ جْبِيرَة
نْكُونْ صْبَرْ
لْهَادْ الْجَبَّارْ
گَصْبَة
تْغَنِّي مَوَّالْ
فْخَوَاطَرْ السَّامَعْ
انْغَامِي
شْحَالْ گَدِّي مَا نْعَاودْ
وَ نْگُولْ ......[/center]

موضوع: رد: ساكن حزامي 2010-07-13, 08:38

قصيدة جميلة اخي محمد مومر اتمنى لك التوفيق

موضوع: رد: ساكن حزامي 2010-07-18, 09:57

اليك ايها البلبل الشادي
كلما وقفت عند قصيدة من قصائدك الا وشدتني كثيرا ،
احاول فك ما تحمله من صور راقية و ممتعة ،
سلمت اناملك اخي السي محمد مومر
دائما اتابع جديدك،
تحياتي الخالصة مودتي ،
اختك مليكة

موضوع: رد: ساكن حزامي 2010-07-20, 03:19

كلما قرأت نصا لمومر ،
اشعر برغبة ملحة في الكتابة
مومر له طابعه الخاص
مومر له زجله الخاص و المتميز
كما ان لمومر عالمه الخاص
زجال يعرف قيمة الحرف
يشتغل بحفر عميق
شكرا لبلبل الشاوية على تغريدته الزجلية الرائعة
مودتي خويا مومر

موضوع: رد: ساكن حزامي 2010-08-03, 23:37

زجالنا المقتدر محمد مومر

نص قوي بصوره العميقة
و بموسيقاه التي تنساب كغدير مياه
مررت فاستمتعت

شكرا لنبض حرفك البهي
مودتي