فينْ غ نَلقاني البارَحْ

فينْ غَ نَلْڤاني البارَحْ؟

إلى ظلي ...ذاك لمظلل عليَّ
ملي يتعاشى ف قلبي الظلام
و الهم يردم فيَّ كل لحلام
نلقاه ظل دافي،يردني ليَّ
إلى أختي العزيزة مليكة أمصاد

يا الشَّاطَنِي ...
نَخْصَة هي فْ البالْ
يا لمْلَجَّمْني ...
عُكَّازْ راشي مْڤُوَّدْني
ڤودْ وُ على قَبْلة السُّؤالْ
يا الرَّاسَمْني ضْبابَة
فْ سما لحْلامْ
كاتَبْني حْياة ...كُلْها اسْتِفْهامْ
هَانِي ...
ثانِي ...
نْقَلَّبْ فينْ نَلْڤانِي
نْرَقَّعْ
ها الخَيَطْ مْقَطَّعْ
وُ الافْكارْ مَنْفِيَّة فَيَّ
وُ فينْ ﮔمْرَةْ جْوابِي
مَلِّي نَغيب بَلِّي فَيَّ؟

مُحَالْ الرِّيحْ تَهَزّ حْرُوفِي
مُحالْ لبْحَرْ يَخَبِّي خوفي
مُحالْ غُرْبالْ اوْهامِي ...
يَغَطِّي الظل الطَّالْعَ مَنْ لَخيالْ

نَنْزَلْ مَنْ جْبَلْ راسِي
مْرَزَّمْ فْ يَدِّي إحْساسِي
نَغْرَقْ فْ التّرَابْ
نَتَّدْفَنْ فْ المَا(ء)
نَطْلَعْ للتَحَتْ
وُ نَهْبَطْ للفُوقْ
نَمْشي وُ أنَا واقَفْ حْدايا
نَوْقَفْ وُ أنا ماشي مْعايا
نَمْشي لآخِرْ نُقْطَة وُ أنا واقَفْ
نُقْتَلْ آخِرْ وَقْفَة وُ أنا عارَفْ
ما يْخَبِّينِي على راسي
غيرْ الحَيّ مَنْ إحْساسي

البارَحْ غَ نْجِي لْعَنْدِي
نْصارَحْني يَمْكَنْ نْصالَحْني
البارَحْ غَ نَلْڤاني
فينْ خَلِّيتْني وَاقَفْ
نَكْتَبْ وُصَيْتي لِيَّ
على اوْراقْ عُمْري ذاكْ الخَارَفْ
البارَحْ غَ يَتَّكْتَبْ لوحي
بَصْمَقْ مَنْ لونْ جْرُوحِي
نَطْلَعْ لَوَطْيَّة حدورتي
نَنْزَلْ لأعلى نُقْطة فْ كُدْيَتي
وُ الترابْ سْمايَا
وُ سمايا تْرابْ فْ ڤَدْمي

البارَحْ
فين هُوَ البارح؟
لي شَفْتُه وُ ما عَشْتُه
لي عَشْتُه وُ ما شَفْتُه
وُ لي غَ نْعِيشُه يَمْكَنْ شَفْتُه

وُ البارَحْ
يا ذاكْ السِّيفْ الﯖارَحْ
قَطَّعْنِي أوْقاتْ
يَمْكَنْ نَنْفَعْني وُ أنا مَقْطُوعْ
رَزَّمْني لحظاتْ
نَرْجَعْ لِيَّ وَقَتْ ما يَنْفَعْ رْجوعْ
نَتْكاتَبْ مْعَ مَكْتوبي
نَتْعايَشْ مْعَ عيشْتِي
وُ نْجاري ذْنوبي

البارَحْ
وُ فينْ هُوَ البارَحْ؟
هُوَ اليومْ لمْسافَرْ فْ غَدَّا؟
هُوَ غَدَّا الرَّاحَلْ لْبَعْدُه ؟
هُوَ الزمانْ لَمْرَقَّعْ
مْخَيَّطْني غُدَّة
إلا جيتُه مَنْ الزمانْ الماجِي
يَحُلْ لِيَّ دْراعُه يڤولْ :آجي
ها خَريطَة جْراحَكْ
ها حَدَّكْ
ها مَحْدودَكْ
نْحُطْ راسي
نَتَكَّى على عُمْرِي
نَوَسَّدْنِي مْغَطِّي بْ البارَحْ
وُ البارَحْ
يا ذاكْ الجارَحْ
بْغيتْ نَبْرَى مَنَّكْ
نْقَطَّعْ بَزُّولة هَمَّكْ
وُ نْوَجَّدْني باشْ نَلْقانِي
وُ يَلْقاني لي جايْ

وُ البارَحْ
ياكْ شافْ فِيَّ
وُ ما دَّا عْلِيَّ
راكَبْ عْلَ ظْهَرْ الوَقَتْ
مْسَمَّرْ البَرْكَة
مْنَخْلُه أنا وُ ناعَسْ حَسْكَة
يجيني فْ لَفْياقْ
وُ يڤولْ لِيَّ: "راهْ بْ الذْهَبْ مَشْري"
وُ أنا نَجْري مَجْلِي
مَنْ بَزُّولَة الوَقَتْ
لحْوَضْ اللذَّة
وُ التَّاعَسْ فِيَّ يَجْري عْلَى سَعْدِي
وُ النَّاعَسْ فِيَّ فارَزْني وَحْدِي
وُ البارَحْ مَنْ عُمْري
ما جْرَى ...
ما ضْرَبْ حَسْبَه لْكُبْري


كيفْ نَرْسَمْ خَريطَةْ هَذا لَعْمَرْ؟
نَرْجَعْ ؟
وُ لا نَقْطَعْ... لْلشَطِّي اللِّي ڤُدَّامِي
نَهْبَطْ ؟
وُ لاَّ نَطْلَعْ... نَتْصَالَحْ مْعَ احْلامي
نْفَرَّقْ وُ نْصَدَّقْ لَوْهامْ
وُ عامْ وْرا عامْ
يَموتْ طَرَفْ فِيَّ
وُ نَلْڤى راسي راجَعْ لْلڤُدَّامْ
نَحْرَﮔْ لْذاكْ الزْمانْ لِّي كانْ مْسَﮓَّمْ
نَهْرَبْ لْصورْتي
مْزاوَگْ فْ وْقْتِي
يَوَصَّلْني لَلْبارَحْ
وُ ها لوحي مَلْيُوحْ فْ جْروحِي
وُ ها الْبَكْيَة مَلاَّتْ عَيَنْها
وُ هاني
ثاني
نْقَلَّبْ فينْ نَلْڤاني
غَ نَلْڤاني فْ زمانْ البارَحْ
وُ كيفْ زمانْ غَدَّا
يا وَعْدِي راهْ لْڤانِي ؟