حرف واحد مكسور

الحب عافية
لغدر رماد
**
هي بغاتني
ليقتها ناسية
زادتني لعذاب
**
بلعكس هي راضية
والله ما بقيت قادر لڭراد
**
آشنو الحل
تبعاتني أنا ولد سبعة شهور
**
طاح الضيم وزادتني الذل
لميمة ضاعت ، ومشات لقبور
**
طرحت من جفل البغل
معند الناس ما تڭول
البغل مات وأنا مزال نعقل
**
خلاتني وحداني ندور
العيشة ناقصة
وتعكست الأمور
**
خفات وجها، وتبعات المنظور
قلبي تشوط ،طلق ريحة البخور
ريحة زعيطة، ورش وزيد رش
ريحة العطور
*****
تولدت ناقص، وفين شهرين
ماتت وهي باهية
تمنيت ....!كن حفرتوا لينا قبرين
**
الناس فاضية
وآنا غرقت في أول تمرين
**
تقفاتني وبكيت
زادتني عذاب وتكويت
وكثر علي لحديث
أنا خاطري عليها رضيت
ف الأول رفضت ، ودابة بغيت
آنا كبرت ونسيت
**
جيتكم من بعد ما كنت ف الغياب
نسيت الماضي ولا نسيت العتاب
**
أنتما السما وأنا السحاب
أنتما العين وآنا الأهداب
**
راسي ..ياراسي
يا لي ضاع وقتك بين ضراسي
**
راسي... يا راسي
بغيت نرتاح وفين ضيعتي فراشي
**
راسي... ياراسي
نشوف ما تكلم
أنا بك اليوم محزم
**
نصرف حروفي ...عليك نبقى مأزم
نتمناك تكون راس من ريوس وبية تتحزم