فْ لمسيد

موضوع: فْ لمسيد 2015-03-27, 10:49

فْ لمسيد

ونا فْ لمسيد
تعلمت لحروف
مَ الليف ل لْيا
بين لحرف وخوه
عشت حكاية وحكاية
شي داز للراس
كيف شريب لْما
وْشي داز
ب نغمة لَعصا
سلكيني وْيا مّا
عرفت اللي يْنقّط
واللي ما ينقّط
من بعد مانقْطّهم
دموع ..دموع
تْهجيت لحروف
وهي مرفوعة
عل الرفوف
مكتوبة صفوف
ح- ب
ن- ا – ر
ظ- ل- م
ق- ه- ر
قريتها حروف
غير داوية
مَ لمعنى خاوية
ما ليها عيار
ما فيها غيار
ما عليها غبار
دازت سنين
سولت راسي:
واااش باقي عاقل
على سيد لفقيه
مول الرزة ولعباية
مول الزلاط ولخزرانة
تبدلت لحوال
جوف بنادم
ولاّ عامر
ب لحروف تامر
وْعيت لحرف
اللي قْريت
وعلى معانيه
شحال بكيت
بين لحرف ولحرف
احوال
لحوال كل يوم
فْ تبدال
مرة يكبر...ويصغار
مرة يتباع...ويتشرى
او مرة يدير كمامة
ما يعود ليه صوت
باين ومسموع
تحس ب الضيم
مين يكون مقموع
شحااال من رمانة دوات
وكَالت حروف
شحااال من جمل وقف
ما بقى فيه خوف
شحااال من بير فاض
خرّج ما ف لجوف
شحااال من حمام طار
بْ غصنو باقي يطوف
...
آه عل يام زمان
وعلى عقل الصْغُر
لحرف فيه منقوش
كيف النقشة عل لحْجر
تشوفو شجرة نابتة
تشوفو صخرة ثابتة
هنا وليه يدوي
او بجمر الهم مَكوي

نجاة احسايني س/أ/غ