القصيدة

موضوع: القصيدة 2015-03-27, 01:40

          القصيدة

              سرَّمت شل كلام
خيوطوا من صوف
ودرت كبة
كبة على كبة
من الحرف علات القبة
المغزل يشالي
فيد لالة غزالي
عليه تجمعت الصحبة
والدكر يلالي
بكلام غالي
به الكبدة معدبة
سدينا أو عاودنا
مشينا وجينا
والسدَا خيوطوا مجبدة
جات القصيدة بالحرف شديدة
للمنسج مسكدة
دوزت الخيط فالمنسج
بعيون مفردة
وبحت بالسر
ولفيت العكدة
القصيدة وحدة
طلت من فوق راسي
بعيون مشردة
غزلت كلمة
سديت كلمة
ونسجت حروف الظلمة
تطلعلي نهار
يجي المختار
يقطع بالحكمة
طلعت
القصيدة وافية
بالنوع فريدة
والمقاصد ماهي خافية
ليها فرشنا
وبها تغطينا
والحروف بالولف دافية
حال المنسج
تبدل
والعكاكيز حافية
المغزل تهرس
فيد لالة شافية
القرشال شرف
والسنين حافية
والحرف تلف
ما بقات الصوف كافية
دار المغزل بالمقلوب
وعيون الشمعة طافية
حق الكلمة
مزال مسلوب
وبقات فالجوف عافية
والحرف فالراس
تعب ما صاب خلاص
ولا نية صافية

وانا.. وانا.. وانا
ضاع غزيلي
ما بقاتلو قيمة
وانا.. وانا.. وانا
ضاعت الجدبة
والحروف سقيمة
وانا.. وانا.. وانا
ويا خاوتي
احمد وحليمة
وانا ..وانا.. وانا
تايه فدروب القصيدة
و هادالقصيدة فريدة
تقاوم وكار الخيبة
                 وجا فيها لكلام ضو
                ينور طريقي لكدام
                     يروى الخاطر
                 ونفتل حرفي من جديد
                بسمة ...
                فرحة...
                وتعود القصيدة لزماني
                اللي ولَّى
                تخطف شربة
                من عين الكلام
                تسقي لرواح العطشانة
               معاني تَلْفَات بين الكلام
               والخافي بين الحروف
               من زمان المحبة
                صف ..
               ودف..
              وعشق بالوف .
              هاد القصيدة جات بلسم
              يداوي جراح الهم
              يطفي شقاي
             ويشعل كلمة الحق ف جوفي
             يرجع العز أَ ليام
             ونشوف الحرف ضاوي
             بين أهل الكلام .
             القصيدة رخام
             بها تزينت مراسم لحباب
              والدخول سلام
              يرسم طريق للمحبة .
              القصيدة عش الحب الدافي
              بها تكتب الستر
    وروات اللامة
             وعمرات خزاين الصحبة .
    القصيدة الولف
             برم وتكيف
             وذوق طعم الحرف
              المغطوس فالمعنى .
    القصيدة ليلي ونهاري
    علمتني نعشق
              نعطي بل حساب
              كلشي مزمم فالمكتاب.
            علمتني نكول كلمة الحق
            فالرخا والشدة
            وتكون لي عدَّة
           لزمان لفراق .
    علمتني نشوف الدنيا
             بعين زاهية بكل الألوان
              جناين الورد
              جناين الزهر
    وجناين النوار
    تَتْعَتق بعطورها الفايحة لرواح .
             علمتني نسمع
             نتمعن المقاصد
             علمتني كيف نتقبل
             حرف غير حرفي
             واخا حرفي مخالف
             علمتني نشكي
             نبكي ..ونفرح
             نهجي ..ونمدح
            ونحكي لغاي
            ونطرز عشقي
            فوصاف الساكنة فجوارحي
            الراكبة حروفي
            تخيل فرحاب القلب .
            القصيدة لالة مولاتي
            فيها كتبت حلمي
            وسطرت رجاي
            فيها سهرت مع نجوم الليل
           تعلمت الحرف
            وكتبت الحرف
           وكسيت الحرف
           ولونت الحرف
           وجات الحروف ملهوفة
           تبني كلمة
          ترسم المعنى
         تروى القصيدة اللي فيها تربيت
         كبرت مع الحرف
         وعشت بالحرف
        وعشقت الحرف
        فعش الخاوة
        بحر الكلام
        منبر الحق
        لعاشق الكلام
       في زمان الغواية
       القصيدة باقية عل الدوام .


عبد العالي الوالي ميسور 2013/04/03