ضركة الحب

[center]
ضركة الحب   

الحب شهدة تقطر 
من قلبك  
ف قلبي  
ف قلوبنا
ملي القلب يبغي..  

و ب قدرة قادر يصبح
 ضركة و كلها شوك .. 

ما بين الضلفة والضلفة   

ولفة ٬  

لهفة،  

وبحور شوق ..  

ومابين الضركة والضركة    

ضربة ف الوجه 

ضربة ف الصدر  

ضربة ف الظهر  

وضربات تشعل مجامر الضر  ..

يلاعطيتها بالظهر   

باش نْبَرّد حر الضربة  
  
تتحير   

ترخي ف ياَّمي سم الجدبة
  
وتحكي  

 وتصر حسايفها فيا   ..

ويلا عطيتها بالوجه تشرطو  

باش ما يبقى عندي وجه ل حب

نسرجني ونمشي ف طريق الصبر 

نحني الظهر نزيدني ضبرة على ضبرة  

و نبقى مرا  

 هازا همي ف الصدر

هزتني هوايش الحب  
لقيته بين ضلوعي  ، 
ف تراب  رجوعي 
و وجاعي
كل ما سقيتو صبر
شق تراب  العمر
و سقانيغلة ماتبرك ف ركابي.. 
راسي يا راس لمحاين 

سعدك من أول حب باين..!

يا هلي ياعشراني 
يلا سما الحب ف يوم غامت 
 وصبات 
راها ف رمشة عين
تندم وتسحى.
وها وجهي وها أنا 
 يلا سما الحب صفات ..!
حيت الحب جغمة  ،
نغمة ،
وبسمة،
وتشهاوها كاع البنات..[/center]