عبد العزيز سرحاني
عدد المساهمات : 116
تاريخ التسجيل : 10/05/2013
 | | موضوع: حلال التعاودة 2014-11-18, 11:57 | |
| حْلَالْ التْعاوِدَة تلاتين... تلاتين عام... تلاتين عام معاك تلاتين عام حداك وانا هو انا وانتِ فينك انتِ؟ يمكن ضهري عواج حيت كنقلد المواج فاش كتبايع البحر باش تبين المحبة واضحة بلا تعواج يمكن شعري شاب حيت كنقلد الجبال فاش كتلبس لَبْيَضْ وتعانق السحاب وتعلا حتى تنسى شحال مازال خَصْها باش تُوصَلْ لْ قَدَّكْ من عداب يمكن هبطوا الركابي ب كْتَرْةْ العقابي اللي طلعْتْ كنجري و كترة العتابي اللي عْتَرْتْ حتى تَلَّفْتْ وْتادي باش نْوَصَّلْ قلبي يْخاوي قلبك و يْوَلي أعز احْبابي يمكن كلامي بْسال ونعاسي تْقال وتخمامي قلال حيت خايف نبدل حالي نولي حاصل ف موال وأنا غنايا مْهَرَّقْ غالبُه الهبال تلاتين عام معاك تلاتين عام حداك وانتِ هي انتِ وانا فيني انا ؟ يمكن حجبتي شعرك وطلقتي لباسك وسجنتي الضحكة اللي كانت نَعْتَكْ وعنوانك باش ما يشاركك مْعايا غير أَنايا ف سكاتك وأحلامك وكلامك وسلامك يمكن زاد وزنك كيف زاد عنادك وقلال ضحكك ك قلال صبرك حيت خْمَرْ الحْيا فيك وفاض حشمة عليك و طْبَعْ ب طابْعُه طَبْعَكْ و حْوالك وخَلاَّ جنوني قدامك كيتلفوا و يْسَلْموُا سَرَّي لْ سُلْطانَكْ تلاتين عام معاك تلاتين عام حداك وحْنا هما حنا وحْنا فينَّا حْنا ؟ يمكن خصنا تلاتين خرى ولا عمر جديد ف مَرَّة باش نحلموا ب اللي جايْ باش نسبقوا اللي مضا وقلوبنا ترضا وخواطرنا تهدى وعيوننا تندى فاش تشوف قلوبنا كتبايَعْ الخاتم الفريد اللي جامعنا . شتنبر2014 | |
|
عبدالعالي الوالي
عدد المساهمات : 54
تاريخ التسجيل : 20/09/2013
العمر : 50
| | موضوع: حلال التعاودة 2015-04-05, 11:11 | |
| بوح جميل صديقي العزيز مزيدا من العطاء محبات | |
|
