الغول

موضوع: الغول 2014-07-26, 12:36

الغول
دّاتني عيني ومشات
وماجات فين تغرق ف النعاس
حتى دق عليها م لفوق الراس
ب كَادومة وفاس
بااااااز ليك
يحلا ليك النوم
بحالك بحال شي قوم
اللي مْخرّج راسو م اللوم
خوتكم طايحين
ب لْكوم
مشويين ب نار الشوم
ب سباب صهيون
غارقين ف الدْمايات
عوم
....
آش ف جهدي ما ندير
بحالي بحال لخوت
مكتفين حتى لموت
ف راس مالي
قلم ودواية
نوصل بيهم لغايا
يشكي لّلحجر
يذوّب الصخر
وْمايبكّي قلوب الشر
....
بكات عيني
وحقْرت جفوني
عل اللحظة
اللي بغاوْا يْوَسْدوني
ونساوا ما جاري ف لكون
مَ الذل ولهون
نساوْا بَ اللي كاين عيون
ماتغمّض ما تشوف نوم
ب سباب صورة لغول
ب الليل والنهار
جارح
بين السما وْلرْض
سارح
للصغير وللكبير
ذابح
طالق الدخان
ف كل مكان
شاعل النيران
ف لبدان
يشيع اكفان واكفان
غيرو محزون
وهو فرحان
داير جنحان
م الشرق ولغرب
واكل أو شبعان
صهيون بّاتْ لغول
يعفس ب لكْدام
على بني آدم
ما يخلي عيون الصبيان
تنام ولاتشوف
احلام
عل للّحجر تْعودوا
لَفطام
وقولة "الله اكبر"
فَ لفّام
نجاة احسايني وجدة 23/7/2014