تاهتْ الطْريقْ
تاهتْ الطريقْ فْ مْواجْ السْرابْ
لَعنادْ حْرقْ جْدورْ التْرابْ
نْشَفْ مْزيوَد الزَّادْ
الگربَة بالزَّز
لمَّتْ قطْراتْ
الزطّاطْ تلَّفْ لَمْساربْ
كانتْ مَحفُوظة عندُه
كِ صباعْ يَذُّه
ما قْدرْ يْفرَّزْ العفْطاتْ
لمْريرَة سرْقتْ لحْوافرْ
الوقتْ رْجعْ لُّورْ تالفْ
يْقلَّبْ عْلى عكَّازْ عاقلْ
يْصحَّحْ الزلَّاتْ .
يَا مرْجَة غَارْقَة
شلَّا هادْ الغيسْ
جْناحِي هرْسُه الرِّيحْ
مدِّي ظهْركْ ...
نْلاقي رْيوسْ لَحيُوطْ
نَتخَطَّى غابْتكْ ...
نَقْطعْ للشَّطْ العامرْ بالظلْ .
نْسَقْسيهْ عْلى حُوريَة
دازتْ فْ سْفَرْ
نْحلْ عُقداتْ السَّرْ
نشُوفْ رقْصات الشجرْ
هْوى للْخاطرْ
فْ جْبالْ داتي
يْزرْكْ الوادْ المَحْبوسْ
يْفيضْ على اوْراقْ تضْوي
تهْدرْ ...
قَصَّة واحدْ
راكبْ ضدْ الرِّيحْ
والنَّاسْ عايْمَة فْ الشَّكْ
لا حدْ تيْقُه ...
هَزْ فْ احْلامُه حْملْ
وحْبَا
علْ الجَّاجْ
يَمكنْ يوْصلْ .
فْ حَمْلة زْمانْ عامَر بالشُّوكْ
حَطْ إيمانُه ضمَّادة لَجْراحْ السفَرْ
تْوسَّلْ الشمسْ ليها تْجرُّه
والگمرة تْكونْ سَرُّه
ونْسَى كْلامْ رْخيصْ
يْهرَّسْ يْقينُه .
منْ گصْبة
فَصَّلْ عُكَّازْوَ لِيرَة
ومْشَى
يْتبَّتْ الخَطوة بْ عيْنُه
يْدوقْ النغْمَة بْ لسَانُه
تابعْ مْريرة
هْنا يَلحَقْها ...
لْهِيهْ يْشدهَا...
[rtl]
يْدَّرْدَمْ فْ لحْجَرْ [/rtl]
[rtl]
يْنوضْ مْدهشَرْ[/rtl]
[rtl]
ما يْشَدْ منها غيرْ الغَمزَة [/rtl]
[rtl]
زينَة طيْحتْ لْثامْها [/rtl]
[rtl]
جَرَّاتُه للشّهْوة[/rtl]
[rtl]
غْرقْ فْ مَليونْ گلتة [/rtl]
يْكدَّدْ فْ كَدْبَة
تْبيضْ بيْضة بْ الصَّح
يَخرجْ منها طيرْ حُرْ
يْحَوَّمْ فوقْ الجْبلْ
ما يْقهْرُه بَرْد
ولا حَرْ
يْرشْنا بْ حْمامْ
فُوقْ ريوسْنا يْبرْكمْ
اللسانْ يْسيلْ وادْ
يْوَرَّدْ الفدَّانْ العَطشانْ
فْ صْدورْنا
للدَّمْ .
الرئيسية 
