أنا والحلم ...
شديت الحلم من رجلو
كان سَالْت
كان عارف النهار طال
ياك الضو غي مزحة
وهو ما يقبل المزاح
داك الحلم طف
شكون قتلو
شكون عارف سر الحكاية
شكون كان سباب ف البداية
شكون يفكرني بصورة منو
كيف كان جميل
منور ظلمة الليل
داير شعالة
دفات كاع الحاضرين
بين حروف الليل
حجاية من راس جدي
طلات تكدي
دوك الكلمات .
ف صدر الكول
توشمات الحكاية
سر الجبل
هروب الوط
وعيون الساكية
كبات جروح القلب
ف جنان الخاطر .
لقيت الحلم دسة
كيراود الفقسة
ف رحبة الوقت
يمكن تشفق
يمكن يكون حلم جديد
يبني أمل
واخا يفنى
يكون معلق ف جناحو
حلم جديد لغدا .
داني داك الحلم
نشوف أحلام البارح كيف كانت
ونقيس عليها حلمي
يمكن يجي صادق
مكتوب ف وراق الحق
يتحقق
يمكن يجي ناطق
بحروف غير الحروف
اللي كانت بكمة
ف كفوف الورقة
نهار سال المداد بل شوار
وكتبها للحال
ف ساعة المحال.
بق الحلم تماك
ف ركنة من داك الحلم
بقينا تالفين على الفكاك
حتى كحالت الشوفة ف عين الحلم
الحلم غير حلم
فيه البسمة حلم
فيه البكية حلم
فيه السلم حلم
فيه الحرية حلم
فيه انا حقيقة ف دروب الحلم
بقيت تماك
ما لقيتني
ما تحقق الحلم
ما رخفات الوقت
لحبال الكارفة لخواطر من يدها
ما جرتني نتهن مني
ويرتاح الحلم ف بالي
ما طلقتني نشوفني
كيف الخاطر بغاني
ونكون انا والحلم حقيقة
ف جنان الحق
بالحق
يكون غدا سالم من ظلمة
غير الظلمة
اللي ف القلوب ربي بها عالم .
نشوفني ضو ف زماني
ضي الحلم وحدو يكفاني
فيه رسمت كلشي
صورة من جناني
زوقتو بالمحبة
والصدق حناني .
كان الحلم
رجاه ف الفرحة يلقاني
نبني ب الحق زماني
يرجع الحلم حق
محقق ف زماني
الحلم ضواية المحروم
يونس به راسو
يراود حروف الوقت
اللي كشفو وتساسو
يفرح به
كي وليد صغير
يلعق بصباعو
الباقي من كاسو
الحلم طار نعاسو
وطيرني
فيق فيَّ كلشي
غرس الليل فيَّ ماسو
ما قتلني
ما حياني
بقيت مع الحلم
نشوفو
يتهجاني ف النطق
بالزربة ينساني
نعاودو ف البني
يصيبني كيف خلاني
انا والحلم ف كفوف الوقت
هو ما يتحقق
وانا باقي مع الحق
نغرسو
ما يصدق ف جناني .
عبدالعالي الوالي
الرئيسية 