قصيدة : وَضّْيتْ الكَلْمَة قْبالة النَّاسْ

يوسف الطاهري
...
....
وَضّْيتْ الكَلْمَة قْبالة النَّاسْ
شافُونِي فَ الحَرْفْ
ف الرُّوحْ الِّلي سَكْناه
كانْ غِ مْرايَة لَهْمومِي
و الناسْ قَالَتْ
المَجْدُوبْ مَ يْواتِيهْ كْلامْ
غِيرْ إِلي كانْ
لْسَانُو حْذاهْ أو حَالُو مُراهْ
أنا وِيلا كانْ حَالِي ف ضَوْ شَمْعٍي
و لْسَاني فْ راسْ العَكْبَة
فين تْلَوَّى الزْمانْ
أو جَيَّفْ ضَلْعَة من ضْلُوع زماني
أنا حَالَفْ
نْعَنَّكْ فْضُولْي عَلْ الدْوامْ
و نعَشَّبْ مَ بْقَى ف زَوَّاْدِي
مَنْ كْلامْ
وِيلَا غَيَّمْ قَنْطْ لَحْرُوفْ
ف سْمَا حْروفِي
و طْفَاتْ الضَّوْ مَنْ هْبالِيِ
نْوَرَّدْ عْطَشْ كْلامي
ب عْروسْ احْلاَمْ
شَلا مْعَاوَلْ
مْكَوْدَة لِيامْ أو رابْطَة لَحْزامْ
...