توحشت صوتي

موضوع: توحشت صوتي 2014-01-28, 09:19

توحشت صوتي

توحّشت صوتي

قلّبت عليه

مالقيتوفْ جوفي

تلف بين حروفي

زاد عليه خوفي

عيّطت عليه فْ كل مكان

بين لَجبال والادغال

ف لمطامر ولمجامر

راهْ مْهني...ولّى محروق

راه يغني ...ولّى مشنوق

راه مْسلسل...ولّى معتوق

......

توحشت نسمعو

رعد ف السما

يشق السحاب

يفتح لبواب

يبدد الضباب

يبدل لعذاب

يهَجَّر لغراب

يْخوّف الذياب

يفضح لكذاب

....

تمنيت نشوفوسيف

يقطع الرقاب

يقاد الركاب

يوطي لعكَاب

يزوّل لكراب

يمحي لعتاب

يصرف لمكتاب

.....

تمنيتو حمامة تغرد ف السما

يرفرف ب جناح

يوصل صوتها الصداح

يوم ما كان لبراح

يعطي لبشارة ب لفراح

ونعيشو يّا مَات ملاح

....

تمنيت نشوفو شمس

مْلَعْلع وضّاح

به تبرا لجراح

بنادم يعيش مرتاح

مايبقى شطاح

مايكون نطاح

ب لحق تعمر لقْداح

ونسمعو يكبَّر كل صباح

ك يكُولوا

اللي يتمنى خير م اللي يتسنّى

ونا

مازال ك نقٌلَّب

باقي ك نقَلَّب

هنا ولهيه...لهيه وهنا

يمين وشمال...لْفوق ولْتحت

مانكُولش عْييت

مانكُولش ملّيت

ما نكُولش تْهديت

بلا بيه

شحال من حي ميت

شحال من قريب بعيد

شحال من حاضر غايب

شحال من صحيح مريض

شحال من عاقل مجنون

......

نجاة احسايني 26/1/2014

موضوع: رد: توحشت صوتي 2014-01-30, 05:52

تحياتي للمبدعة نجاة
اشتغال ذكي على المتضادات
شكرا على الامتاع
عزيز صدقي

موضوع: رد: توحشت صوتي 2014-01-30, 09:59

عزيز صدقي كتب:: تحياتي للمبدعة نجاة
اشتغال ذكي على المتضادات
شكرا على الامتاع
عزيز صدقي

تحياتي سيدي واحترامي شكرا على المرور والبصمة الطيبة

موضوع: رد: توحشت صوتي 2014-02-12, 07:59

السلام عليكم ورحمة الله
بوح رائع زاخر بالمعاني الراقية والإحساس النقي
الله يزيد ف حلاوت لكلام

موضوع: رد: توحشت صوتي 2014-02-12, 09:19

عبد العظيم هريرة كتب:: السلام عليكم ورحمة الله
بوح رائع زاخر بالمعاني الراقية والإحساس النقي
الله يزيد ف حلاوت لكلام

وعليكم السلام ورحمته تعالى وبركاته
سلم ذوقك الفني سيدي وشكرا على المرور الطيب والبصمة الراقية
تحياتي...

موضوع: رد: توحشت صوتي 2014-04-01, 04:42

إذا تحرر صوتك منك فصوت قلمك أقوى، و لقلمك أصوات بارك الله فيها ، صوت للإبداع ،صوت للإشباع و صوت للإقناع فهنيئا لك بهذا المخزون