صحاب لوقت

راني ساهر هاد الليله...نخمم ونقاد لـحروف
مال هاد لحياةْ لويلـه ...عايشين لحكّْرَ ولخوف
واحـد دّاهـا بـلحيلـه ... لاخـر قاعـد ويشـوف
هالّي تايقها وهبيلـه ... هالّي بالصّوف كي لخروف
ولّـي معـاه قـلــيلـه ... ولّي من ريشو منتوف
يّام لحـكّْْْره طويلـه ... متوْصفـهاش حـروف
وانا ساهر هاد الليله...وراني بسهيري معروف
......
شحال من هدرَه خسرات...بانْيِنها على الخاوي
خير من شـي السكـات ... هو دوى ويداوي
قالو لّي فات مات ... ولّي جاي فمطاوي
هالّي بايت فشتات ... هالّي عايش بتناوي
هالّي دافعها لغوات ... وهو من داخل خاوي
شي عايش بلفتات ... شي مكّْهوم بلمشاوي
شي بلجوع مات ... شي بالسمن ولملاوي
ياك حنا كلشي خوات ... خاص لي يحكم إساوي
.......
شفتْ لمدون مقامر ... والزهر هو لّي يختار
أنا عشت عمري مغامر ... ومازل ملقيتش الدار
شي بالشوى ولمجامر ... وحنا كي لقط ولفار
شي فبيروه شاخر ... وشي طالي لغبار
وشي بتخمامو عامر ... وشي قصّار فلبار
شي من اللوْل خاسر ... صابر كاتم لضرار
راني بهمّي عامر ... وردّيتْ همي فدفتار
......
صحاب الوقت قهرونَ ... كّْاع لي داروه مزيان !؟
فيهوم غير لقمّونه ... ولخاوي إبان إبان
لفلوس فلفوق مسكونه ... الحال ديمَ مزيان
هوم جيابهوم سخونه ... وحناكلشي عريان
الشابع فينا بزيتونه ... ولّ شبعانين حزان
لهموم بينا مقرونه ... ولفرحْ يمشي زربان
هدرنا وما سمعونَ ... سكتا نغزّو لسنان
بغيناها زعمَ موزونه ...ياك عدنا ميزان
وْ إلى غابه علمونه ... ولحال يبان يبان...[b]