قصيدة ريق الكاس ***ديوان دسارة الندى
خلـِّيوْ الكاس ايـسامرني
أنا ما شكيت لـِكم أرفاگـتـُه
خلـِّيوْ لـَعمر يسرقـني
أنا ما طلـبت منكم
اتـسَلفوني مـَن اعْماركم
شـْكون علـَّمكم فـْ ذِيـل اللـِّـيل
اتـزوروني حازنين
اتـبـَكـِّوْ العين اللي ما تبغـيني
و اطـِّيحوا فْ احْضاني مـْساخفيـن
راني مانـْسيـت
اللي دَوْزاتـُه الرحى على الگمحه
و جْـراح لـقلام على خـْدود الصفحه
واش هـَادي هـَـبـْله
جـيـتوا اتـْهبـْلوها علـِيَّ
هذا كاسي
وذ ْنـُه صادقه ما تـَْسَــفـَّه كــْلامي
شْحـال مَـنْ لـِـيله
انـعـَـلـْت شيطاني
حـَلـِّيت باللـُّوز لساني
و اخـرجت انـْدَنـْدن ..دَنـْـدن أو دانــــي
شـْحال اتـمنـِّيت اتـْحـَلـُّوا بـــابـْكم
اتطــَّلوا بعـين الرَّحــمه
على الواقــف فْ اعـْـتابكم
و شْحـال مـَنْ لـيله
رجَّـعتوا الرْجـا فـِـيَّ
رَجـْعة الصَّوت الـموجوع
فـْ الصدَر المولوع
شـْحال مَـنْ لـِيله
سدِّيـتوا القلـوب بَالغـيس و الطوب
ردِّيتـوا لـْمـَا جـهـْة السْهُـوب
خلـِّيتوا شيــحي شاحب
وْ نـدَّى الليل بـْريق اشـْفــَايفـُه على حافـة كاسي
اعـصَرْ عـَصْره
ذقـْـتْ الغـفله الليِ فيـها القلب ساح
اهـْدَت الروح و الخاطر ارتاح
اتـعـَلـَّمت نـَطـْبَخ ريقـُه خمََره
فـْ رياض العرصه
نـَـشـْرَبْها حتـَّى نـَقدر ننسى
وْقوفكم يا العيون العاسَّه
ضدي أيَّام الحگـْره والعـدَّه
ريـق الـكاس تـلاّ َّف
تلـْـقى اعـْشيرُه ما يلقى معاه خـْلاف
ريـق الكاس عشير الخاطر
ما ايـسـَولك على اوْلاد
ولا وْسخ الدنيا ولا اوْتاد
ولاعلى صَهد ولا امْطار
ايـشـدْ يدَّك شـَدَّة العارف لـْمـِيل الخاطر
ايرَج اعماقك..........رجَّه
اتـرَشْ الخمله مـَنـَّك و النــَّهجه
اتـخلـِّيك اتـحَـس بـْ الشـْباب
يـَتـْفـتـَّق فْ اعماقـك ورده
يـَاخدك مـْسافر لـْ أرض بعيده
صفـَّفـْها قـْدود
فـْ عـْقـل مفـْـقود
ايسـِـيـح الوهـم على الصدر زبده
ايـدَوَّر احيـاتك بـِـيـن اعيـونك قصَّه
تقـراها الدمـوع على الخاطـر
نبْـده..........نبْـده
عـارف راسي غاطس فـَ النـَّعله
عارف كاسي ما تـْحط عـليه نحله
عارف كـْلامي كـْلام عـْتـاب
عارف الدنيا حالها
ما يـَوْقـف عـَنـد قسـوة لـَحباب
و الضَّايه ما تـْكون عند السْراب
عارف.......أو طـَـالب تـُوبتـكم
قـْبـَل مَـن تـُوبـتي
طالـَب قـِيـلـْكم
قـْبَـل ما نـَطـْلب مـَن الـكاس يـْقـِـيلني
الرئيسية 
